Qazaqstanda dropperlik shemalarǵa qarsy kúres kúsheiip keledi. Alaida quqyq qorǵaý organdary mundai qylmystyq toptardyń áreketi barǵan saiyn qatygez sipat alyp bara jatqanyn málimdedi. Keibir uiymdastyrýshylar banktik shottarǵa qaita qol jetkizý úshin adam urlaýǵa deiin barǵan, dep habarlaidy ult.kz.
Jyl basynan beri Qarjylyq monitoring agenttigi aqshany jylystatýmen ainalysqan 33 dropperlik toptyń qyzmetin toqtatty. Tergeý barysynda qylmystyq shemalardy uiymdastyrǵan 40-tan astam adam anyqtalyp, zańsyz áreketke 500-den asa azamattyń tartylǵany belgili boldy. Dropperlerdiń banktik shottary arqyly 112 milliard teńgeden astam zańsyz qarjy ainalymy júrgizilgen.
Dropper – alaiaqtyq jolmen alynǵan qarajatty aýdarý, qolma-qol aqshaǵa ainaldyrý nemese jasyrý úshin paidalanylatyn tulǵa. Ádette onyń atyna banktik shottar men tólem kartalary rásimdelip, qylmystyq jolmen alynǵan qarjy solar arqyly ótkiziledi.
Vedomstvonyń málimetinshe, sońǵy eki aidyń ózinde myńnan astam drop-karta buǵattalǵan.
Batys Qazaqstan oblysynda Qarjylyq monitoring agenttiginiń qyzmetkerleri internet-alaiaqtyqtan túsken qarjyny zańdastyrǵan halyqaralyq dropperlik jeliniń jolyn kesti. Tergeý barysynda buǵattalǵan shottar arqyly shamamen 17 million teńge ótkizilgeni anyqtaldy.
Eń soraqysy – uiymdasqan top músheleri banktik shottyń iesi bolǵan 18 jastaǵy azamatty kúshtep ustap, kúsh qoldanamyz dep qorqytyp, onyń banktik shottaryna qoljetimdilikti qaita qalpyna keltirýge májbúrlegen.
Osyǵan uqsas qylmystyq shema Jetisý oblysynda da áshkerelendi. Áleýmettik jelidegi jumys týraly habarlandyrýǵa sengen jergilikti turǵyn kýratorlardyń tapsyrmasymen internet-alaiaqtyqtan túsken qarajatty óz shottary arqyly qabyldap otyrǵan. Keiin ol aqshany kriptovaliýtaǵa aiyrbastap, uiymdastyrýshylar kórsetken ámiiandarǵa aýdaryp, ár operatsiiadan komissiia alyp kelgen.
Al Túrkistan oblysynda dropperlik shema Telegram messendjerindegi jasyryn kýrator arqyly basqarylǵan. Ol stýdentter men kámeletke tolmaǵandarǵa syiaqy usynyp, internet-bankingke qoljetimdilikti berýge úgittegen. Sonyń saldarynan 20-dan astam adam qylmystyq is boiynsha tergeýge tartyldy.
Qarjylyq monitoring agenttigi azamattardy bóten adamdarǵa bank kartalaryn, shottaryn nemese internet-bankingke qoljetimdilikti bermeýge shaqyrdy. Vedomstvo mundai áreketterdiń qylmystyq jaýapkershilikke ákep soǵatynyn eskertti.
