Belgili saiasattanýshy Dos Kóshim bas-aiaǵy tolyq emes jer zańyna baǵa bere almaitynyn aitty, dep habarlaidy Sputnik Qazaqstan tilshisi.
"Moratorii ne úshin jariialandy? Moratorii zańdy ózgertýge, qabyldaýǵa jariialanǵan joq, zańdy qoldanýǵa jariialandy. Sonda biz bes jyldyń ishinde neni kútip otyrmyz. Bizge ne bóget bolyp otyr? Jer kodeksine ózgerister men tolyqtyrýlar engizý týraly múmkindik berildi eken, nege biz sonda moratorii jariialaǵan baptardyń bárin ózgertpeimiz? 5 jyl boiy qur otyryp, bes jyl bitkennen keiin ózgertemiz deimiz be?! Bul suraq meniń oiymsha eń mańyzdy másele. Eger zańdy ózgertý týraly másele týyndap otyrsa, nege bes jyl boiy kútýimiz kerek? Osy másele men úshin túsiniksiz", — dedi Kóshim.
Saiasattanýshy osy rette Qazaqstannyń zańdaryn adam uǵyna almaityn Qytaidyń ieroglifterine teńedi. Aitýynsha, bizdiń zańdy túsiný úshin taǵy bes institýt, bes júz zańger kerek.
"Úshinshi másele zańdarǵa qatysty. Bizdiń zańymyz Qytaidyń ieroglifteri siiaqty. Zańymyzdy túsindirý úshin taǵy bes institýt, 500 zańger kerek. Kez kelgen zańdy qarap shyqsańyz, "eger Qazaqstannyń basqa zańdarynda kózdelmese" degen syńaida jazylǵan sóilemderdi keziktirýge bolady. Sonda biz onyń kózdelgen-kózdelmegenin bilý úshin úsh júz zańdy qarap shyǵýymyz kerek pe? Zań naqty bolýy kerek. AQSh Konstitýtsiiasyn qarap kórińizdershi. Árbir másele naqty. Kez kelgen shopyr, kez kelgen shopan zańdy oqyp, durys-burys dei alady. Al bizdiń zańymyz - shimai-shimai bir bále. Múmkin, keńes ókimetinen qalǵan dúnie shyǵar, kim bilsin. Biz endi muny ózgerteiik. Eki-aq nárse ǵoi jazylatyn: jer eshkimge satylmaidy. Aýyl sharýashylyq jeri degendi qosyp qoiyńdar. Ekinshisi, jer sheteldik kompaniialarǵa berilmeidi. Boldy osymen, sosyn osy eki normany halyqqa kórsetińder", — dedi Kóshim.
Saiasattanýshy urandatyp kóshege shyqqan halyqtyń eki talaby oryndalmai, zańǵa baǵa bere almaitynyn aitty.
"Zań tolyq bolý kerek, tolyq baǵa berilý kerek. Jańaǵy halyqtyń kóterilip, kóshege shyqqan eki negizgi máselesi sheshilmei turǵan ýaqytta bul zańǵa men baǵa bere almaimyn. Barlyq denesi bar, basy joq, júregi men jany joq. Jaiylymdyq jer, shekara aimaqtaryndaǵy másele, jerdi bólý kezindegi onyń ashyqtyǵy men jariialyǵy – munyń bári kirgen, tamasha. Júz paiyz qoldaý múmkin emes. Zań árkimge birdei teń kelmeidi", - dedi ol.
"Biraq eger zań tolyq bolmasa, bul aiqai, senimsizdik áli kúnge deiin qalady. Bir ǵana úmitim bar, Qudaiǵa shúkir Qazaqstanda kóshe bar, 70 paiyzdai qazaq bar", — dep túiindedi sózin saiasattanýshy.
