Qazaqstandyq «Nomad Stunts» tobynyń kaskaderleri Disney stýdiiasynyń «Mýlan» filminiń túsirilim alańynan foto jáne videolarmen bólisti. Atalǵan týyndynyń álemdik premerasy 4 qyrkúiek kúni ótken bolatyn, dep habarlaidy "Ult aqparat".
«Nomad Stunts» kaskaderleriniń qatysýymen túsirilgen «Mýlan» filmindegi eń tartymdy qoiylymdardyń biri – ǵun kósemi Bóri hannyń (bul róldi Djeison Skott Li somdaidy) elitaly arnaýly otriadynyń qytai bekinisine shabýyly. Triýkter qoiýshysynyń stsenariiine sáikes, sarbazdar shaýyp kele jatqan attyń ústinde tik turyp, semser sermeý men sadaq tartý syndy óte kúrdeli qoiylymdardy oryndaýy tiis bolǵan.
«Shaýyp kele jatqan attyń ústinde sarbazdardyń tik turatyn qoiylymǵa bir ai daiyndaldyq. Degenmen, bul attardy bólip-bólip ákelýimen bailanysty oryn alǵan jait edi. Bastapqyda bir at bolsa, odan keiin taǵy eki at taptyq. Sóite kele olardyń sanyn 13-ke jetkizdik. Ai boiy jylqylardy birneshe ret aýystyrdyq. Sebebi keibireýi triýk jasaýǵa sai kelmedi. Buǵan qosa, daiyndyq jasaýǵa arnalǵan yńǵaily oryn bolmady. Prodakshen usynǵan alań kishkentai edi. Hors-shebermen sóileskennen keiin daiyndyqty Tynyq muhitynyń jaǵalaýynda jasaýǵa ruqsat berilip, barlyǵy jyldam bola tústi. Túsirimniń de óz erekshelikteri boldy. Bizdiń jigitterge shaýyp kele jatyp, ertoqym ústinde tik turýǵa, semserlerin sýyrýǵa týra keldi. Al munyń barlyǵyn kóziń ǵana kórinetin betińdegi maskamen, óte aýyr kostiýmdermen jasaý qajet. Biz shabandozdyqty kórsetip berdik. Jalpy, sondyqtan da «Mýlan» túsirilimine shaqyrǵan bolatyn. Prodiýserler at ústinde kúrdeli triýk oryndai alatyn kaskaderlerdi izdegen bolatyn. Kaskaderlerimiz barlyq qiyndyqqa qaramastan júktelgen mindetti oryndap shyqty. Kaskader Murat Burhanov tamasha triýk jasady. Ol Mýlan sadaq tartyp, Bóri jan sarbazdarynyń birin jaralaityn qoiylymda shaýyp kele jatqan attyń aiaǵynyń astyna qulaidy. Bul bir dýblmen túsirildi. Rejisser de triýktiń óte qaýip bolǵanyna qaramastan Murattyń ony óte kásibi deńgeide oryndaǵanyn birden aitty», - dedi «Nomad Stunts» kaskaderler tobynyń jetekshisi, triýk qoiýshy Jaidarbek Kúnǵojinov.
Jobanyń arqasynda «Nomad Stunts» kaskaderleri Disney-men yntymaqtastyqty jolǵa qoiǵan qazaqstandyqtarǵa ainaldy. Al top jetekshisi Jaidarbek Kúnǵojinov golivýdtyq iri stýdiialardyń birinen ról alǵan tuńǵysh qazaqstandyq sanalady.
«Meni akter retinde tosynnan tańdap qaldy. Bastapqyda bul rólge Kanada akteri bekitilgen bolatyn. Degenmen, Netflix stýdiiasynyń «Marko Polo» serialynda birge jumys istegen prodiýserlerdiń biri rejisserǵa meni alýdy kóndirdi. Basty sebebiniń biri – maǵan dýbler qajet emes. Barlyq triýkti ózim jasai alamyn. Meniń alǵashqy túsirilim kúnim áskeri keńeste – Bóri han barlyq generaldaryn jinaityn qoiylymda boldy. Ekinshi kúni ózim jasai alatyn triýk túsirilip, onda atpen shaýyp kele jatyp akter Donni Ienmen semserlestim. Shynymdy aitaiyn, óte baqytty boldym. Barlyq ýaqytta da Disney-men yntymaqtastyq ornatýdy armandaityn edim. Al «Mýlan» jobasynda hors-jattyqtyrýshy (attardy triýkke daiyndaityn maman) ǵana emes, akter retinde de jumys istedim. Bul – baǵa jetpes tájiribe boldy», - dedi Jaidarbek Kúnǵojinov.
Aita keterligi, «Mýlan» filminde «Nomad Stunts» tobynyń kaskaderleri at ústinde óte kúrdeli triýktardy oryndaýmen qatar, Golivýd akterlerine dýbler de boldy.
