Májilis depýtaty Dinara Zákieva elimizdiń keibir zańnamalyq aktilerine balanyń quqyqtaryn qorǵaý máseleleri boiynsha engiziletin normalardy túsindirdi, dep habarlaidy QazAqparat.
«Keshe bala quqyǵyn qorǵaý máseleri jónindegi zań jobasy birinishi oqylymda maquldandy. Árine, normalary ekinshi oqylymǵa deiin áli talqylanady. Atalǵan zań jobasynda tipti aýyldyq jerlerge deiin qajettiligi bar balalardy ońaltýmen qamtýǵa, sýitsidtiń aldyn alýǵa, mektepterde býllingtiń aldyn alýǵa, balama kitaptarmen qamtýǵa baǵyttalǵan óte mańyzdy bastamalar kózdelgen», - dep jazdy Májilis depýtaty Facebook-te.
Onyń atap ótýinshe, zań jobasynda jetim jáne ata-anasynyń qamqorlyǵynsyz qalǵan balalardy sábiler úiinen balalar úiine aýystyrý jasyn 3-ten 6 jasqa deiin uzartý kózdeledi.
«Degenmen, búginde eń kóp talqylaýǵa túskeni kiberbýlingtiń aldyn alý týraly norma bolyp tur. Jekelegen qoǵam ókilderi tipti qujatty «Sarym-Zákieva túzetýi» dep ataýdy usynyp, aty-jónderimizde este saqtaýǵa ýáde berip júr. Eger bul bir balanyń ómirin qorǵap qalatyn bolsa, onda men kelisemin. 10 jyl boldy balalarǵa kómektesýmen ainalysyp kelemin. Qýdalaý, kiberbýlling sýitsid sebebi bolýy jiilep ketti. Osy jyldyń 6 aiynda ǵana 193 bala óz-ózine qol jumsamaq bolyp, 105 qaiǵyly aiaqtaldy», dedi ol.
Onyń atap ótýinshe, kiberbýlling óte qorqynyshty. Sebebi onyń shekarasy joq. Qaskóiden qashyp qutyla almaisyń. Internettegi muqtaýdy óshirip tastaý nemese umytý da ońai emes.
«Osyǵan orai búginde barlyǵy da áleýmettik jelige nazar aýaryp otyrǵany qatty jabyrqatady. Qyzyq, búginde áleýmettik jeli jaiynda oilap, narazylyq tanytyp júrgender mundai jait balalaryna qatysty bolǵan kezde qalai áreket jasar eken?», - dedi Dinara Zákieva.
Máselen, onyń dereginshe, osy jyldyń ishinde Aqparat ministrligi kiberbýllingtiń 140 myń faktisin anyqtap, kompaniialarǵa 1 700 ótinim jibergen. Alaida olardyń tek 20-30 paiyzynda ǵana atalǵan kompaniialar áreket jasaǵan.
«Usynylyp otyrǵan túzetýge sáikes, Qazaqstandaǵy platforma ókildigi elimizdiń kez kelgen azamaty shaǵyn jasaǵan jaǵdaida kiberbýlling faktileri tekserilgennen keiin 24 saǵattyń ishinde balaǵa ziianyn tigizýi múmkin aqparat bar kontentti joiýǵa mindetti bolady. Birinshiden, iri kompaniialar úshin ókildik ashý problema bolmaidy. Ekinshiden, eger demokratiia jaiynda aitar bolsaq, bul máselen, Frantsiia, Germaniia syndy kóptegen elderde qoldanylatyn álemdik tájiribe. Bul túzetýler barlyq memlekettik organmen qarastyrylǵandyǵyn, kiberbýllingten balany qorǵaý máseleleri jónindegi jumys toby aiasynda Úkimet tarapynan usynylǵandyǵyn atap ótkim keledi. Jáne de biz qoldap, olardy engizdik. Óitkeni, áleýmettik jelilerde balany qorǵaý quraly búginde joq ekendigin túsinemiz. Biz áleýmettik jelige qarsy emespiz. Biz balalardy qorǵaýdy jaqtaimyz. Balalar – eldiń basty bailyǵy. Bizde este saqtaimyz degenderge aitarym, jalǵan demokratiialyq ustanymdardy jamylyp, balalardy qorǵaýǵa qarsy bolǵandardy umytpaidy», - dedi Májilis depýtaty.
