Almatyda din taqyrybyna arnalǵan úzdik shyǵarmalarǵa jariialanǵan jýrnalister baiqaýy qorytyndylandy. Túrli nominatsiialar boiynsha jumystary sarapqa salynǵan baiqaý jeńimpazdary arnaiy diplom men baǵaly syilyqtarǵa ie boldy, dep habarlaidy "Ult aqparat".
Almaty qalalyq qoǵamdyq damý basqarmasynyń qoldaýymen Ulttyq jýrnalistik zertteý ortalyǵy 1 mamyr men 1 qazan aralyǵynda din salasyndaǵy ózekti máselelerge bailanysty almatylyq jýrnalister arasynda úzdik shyǵarmalarǵa baiqaý jariialaǵan bolatyn. Búgin sol baiqaýdyń qorytyndysy shyǵarylyp, júzden júirik shyqqandarǵa arnaiy diplom men elektrosamokattar tartý etildi.
«Bul baiqaýdyń basty maqsaty – dini senim bostandyǵyna bailanysty Qazaqstan Respýblikasynyń memlekettik saiasatyn, negizgi ustanǵan ustanymyn, saiasatyn túsindirý, qoǵam nazaryn din salasyndaǵy túrli máselelerge aýdarý. Ult múddesine nuqsan keltiretin túrli dini teris aǵymdar men ekstremistik toptarǵa qarsy kúresti kúsheitýge úles qosý, jat piǵyldy toptarǵa qarsy aqparattyq kampaniiany qurý. Sonymen qatar, bolashaq urpaq boiyna ulttyq dil men dástúr jóninde tálim-tárbieni sińirý», - dedi Almaty qalalyq Qoǵamdyq damý basqarma basshysynyń orynbasary Aidar Esenbekov
Baiqaý sharty boiynsha, materialdar Qazaqstannyń zaiyrly memlekettik qurylymyn qarapaiym ári uǵynyqty tilmen túsindirip, memlekettik saiasattyń zańnamalyq talaptaryn uǵyndyrýy, dini ekstremistik aǵymdardy áshkerelep, dástúr men dinniń ózara bailanysyn jetkizýi, dini ekstremizmniń aldyn alý, teris dini toptardyń ideologiiasy men olardyń ziianyn ashyp kórsetýi tiis bolatyn.
Baiqaýǵa BAQ jýrnalisterinen ózge bloger, ǵalym, pýblitsister qatysty. 52 úmitkerden 120-dan astam jumys kelip tústi. Qazylar ótkir pýblitsistikalyq janrlarǵa erekshe nazar aýdarǵandaryn aitady.
Úzdik shyǵarmalar baiqaýynda aldymen yntalandyrý syilyǵy tabystalyp, oǵan «Túrkistan» gazetiniń jaýapty hatshysy Dinara Myńjasar, «Arhar» saitynyń tilshisi Ashat Qasenǵaliev, «yyvision.kz» saitynyń tilshisi Tólegen Bekmýhamedov, táýelsiz jýrnalist, bloger Gúlden Jandildinova, «Hikmet» teleradiostýdiiasynyń tilshisi Erkin Úsenbaev laiyq dep tanyldy. Syilyq iegerleri 20 myń teńge men arnaiy diplom aldy. Sondai-aq, qazylardyń sheshimimen «Fotóner» qoǵamdyq birlestiginiń prezidenti, belgili fotograf Asylhan Ábiraiymuly «Eń úzdik fotoreportaj» nominatsiiasynyń, «Qazaq radiolary» JShS Almaty stýdiiasynyń redaktor-júrgizýshisi Baqytjan Jarmuhambet «Eń úzdik radio janry» nominatsiiasynyń arnaiy júldesine ie boldy.
Al dini ekstremizmge qarsy kúreste qatarlastarynan úzdik shyqqan jýrnalister men kósemsózgerler tómendegidei nomiantsiialardy jeńip aldy. «Eń úzdik televiziia janry» nominatsiiasyn «Qazaqstan» ulttyq arnasynyń «Iman ózegi» baǵdarlamasy, «Merzimdi baspasózdegi qazaq tilindegi eń úzdik pýblitsistikalyq maqala» nominatsiiasyn «Nur-Múbarak» Egipet islam mádenieti ýniversitetiniń baspasóz hatshysy, islamtanýshy-jýrnalist Aisha Keńesbaeva, «Internet jelisindegi eń úzdik beinerolik» nominatsiiasyn «Almaty» arnasynyń telejúrgizýshisi ári tilshisi Áigerim Erdáýletqyzy, «Internet jelisindegi qazaq tilindegi eń úzdik maqala» nominatsiiasyn Qamshy.kz aqparat agenttiginiń tilshisi Berik Beisenuly, «Internet-resýrstaǵy orys tilindegi eń úzdik maqala» nominatsiiasyn Zakon.kz jelilik basylymynyń arnaiy reportajdar bóliminiń redaktory Torǵyn Nurseitova, «Eń belsendi bloger» nominatsiiasyn Ekstremizmniń aldyn alý salasyndaǵy mamandardy qaita daiarlaý institýtynyń direktory, belgili islamtanshy-teolog Asqar Sabdin, «Merzimdi baspasózdegi orys tilindegi eń úzdik pýblitsistikalyq maqala» nominatsiiasyn dintanýshy, ál-Farabi atyndaǵy QazUÝ dintaný jáne mádeniettaný kafedrasynyń aǵa oqytýshysy Elnar Berikbaev, «Áleýmettik jelidegi eń belsendi qoǵamdyq top» nominatsiiasyn Instagram, Facebook, «VKontakte» áleýmettik jelilerindegi «Biz ekstremizmge qarsymyz» paraqshasy ielendi.
Uiymdastyrýshylar jýrnalisterge qoldaý kórsetý sharalary budan keiin de jalǵasyn tabatynyn jetkizdi.
Esterińizge sala keteiik, dini ekstremizmniń aldyn alý maqsatyndaǵy bul baiqaý Ulttyq jýrnalistik zertteý ortalyǵynyń muryndyq bolýymen Almatyda osymen tórtinshi ret ótkizilip otyr.
