QR Din isteri jáne azamattyq qoǵam ministrligi dini sipattaǵy syrtqy atribýtikaǵa shekteýler men tyiymdardy engizý múmkindigin qarastyryp jatyr, dep habarlaidy «QazAqparat».
Mekeme ókilderiniń aitýynsha, Qazaqstan qoǵamyn óz halqynyń rýhani dástúri men islam dininiń baiybyna jetpei jatyp, óz ata-analaryn dinsiz dep aiyptaityn jastar alańdatyp otyr.
Olardyń keibiri sheteldik ýaǵyzshylardy tyńdap, halqymyzǵa tán emes dini dástúrlerge boi ura bastady. Dál osyndai azamattar syrtqy atribýtikalarǵa erekshe mán beredi: jigitter saqal jiberip, balaqtaryn qysqartady, qyzdar qara jamylǵyǵa oranady.
"Qara jamylǵyǵa tyiym salý oramal men hidjabqa tyiym salýdy kózdemeidi. Bul tyiym salý men shekteý adamnyń bet-júzin anyqtaýǵa múmkindik bermeitin kiim túrlerine (nikab, chadra, paranja) qatysty. Munda bir ǵana atribýtty emes, teris aǵymnyń birneshe belgilerin aitýǵa bolady. Biz bul máseleni zerttep jatyrmyz, zertteýden keiin ǵana sheshim qabyldanady», - dedi vitse-ministr Berik Aryn Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, bul shekteýler men tyiymdar kez kelgen konfessiianyń dini qyzmetkerlerine, shetel azamattaryna jáne meditsinalyq sebeppen nemese qyzmettik qajettilikpen betperde kiiýge májbúr adamdarǵa qatysty emes.
