Dimash Qudaibergenniń Niý-Iorktegi kontserti úlken anshlagpen ótti. Barslays center arenasy qazaq ánshisin súiip tyńdaityn jurtshylyqqa lyq toly boldy, – dep habarlaidy dimashnews.com.
Jinalǵan jurtshylyq ánshiniń ár nómirin zor súiispenshilikpen qarsy aldy. Dimashtyń árbir áni tolyqqandy shoýǵa ainaldy. Onyń repertýarynda túrli tildegi ánder bolǵanymen, tyńdarmandy qazaq tilinde shyrqalǵan kompozitsiialar tebirentip, Dimashpen birge qosa oryndady.
Jankúierlerdiń basym bóligi D.Qudaibergenniń ánderin jatqa biledi. Olar qazaq tilindegi án mátinin túsiný úshin óz tilderine aýdaryp tipti, qazaq tilin úirenip te júr. Dimash «Daididaý» ánin oryndaǵan sátte kórermen oryndarynan turyp, birge shyrqady. Kózderine jas alǵandardyń da qatary mol boldy.
«Kishkentai kezinen «Daididaý» ánin búkil álem ózimen birge aitqanyn armandaǵan Dimashtyń armany oryndaldy. Niý-Iorktiń Barslays center arenasyna álemniń túkpir-túkpirinen jinalǵan adamdar qazaq ánin birge shyrqady» delingen aqparatta.
Sondai-aq jas talant árbir ánin oryndaǵan saiyn: «Meniń otanym – Qazaqstan!», - dei kele, jinalǵan jurtshylyqty elimizge kelýge shaqyrdy. Dimash pen mýzykanttar oryndaǵan «Adai» kúii de jankúierlerdi tánti etti.
Al kontsert sońynda «Elim meniń» áni oryndaldy. Alyp ekrannan Qazaqstan Týy jelbirep, qazaq jeriniń kóz tartarlyq tumsa tabiǵaty Niý-Iorktiń Barslays center arenasyna jinalǵandardy tamsantty. Jalpy D. Qudaibergen oryndaǵan bul án qazaq dalasynyń, qazaq jeriniń naǵyz ánuranyna ainaldy desek te bolady.
Eske salaiyq, D.Qudaibergenniń 10 jeltoqsanda Niý-Iorkte ótken jeke kontsertine álemniń 51 elinen jankúierler jinaldy. Olar ánshini Djon Kennedi atyndaǵy halyqaralyq áýejaidan Qazaqstannyń Týymen qarsy alǵan bolatyn. Gremmi syilyǵynyń iegeri, perýlik ataqty ánshi Eva Ailan Dimash Qudaibergendi kórý úshin óz kontsertin keiinge shegerip, Niý-Iorkke ushyp keldi. Kontsert Qazaqstannyń AQSh-taǵy mádeniet kúnderi aiasynda jáne QR Mádeniet jáne sport ministrliginiń qoldaýymen uiymdastyryldy.
