Tanymal ánshi Dimash Qudaibergenniń elordada ótetin kontsertine biletterdiń basym bóligi satylyp ketken, dep habarlaidy "Ult aqparat" otandyq aqparat agenttikterine silteme jasap.
Bul týraly ortalyq kommýnikatsiialar qyzmetinde ótken brifingte Qazaqstan teleradiokorporatsiiasynyń tóraǵasy Erlan Qarin málim etti.
"18 naýryzda Dimashtyń kontsertine biletter satyla bastady. Kórermender tarapynan qyzyǵýshylyq joǵary. Satylymǵa shyqqan alǵashqy kúni 6926 bilet (30%) satylǵan. Bir aptadan keiin biletter satylymy 11099-ǵa (48,2%) jetken. Búginde satylym 70 paiyzǵa jetti", - dedi ol.
Sonymen qatar Erlan Qarin atap ótkendei, túrli elderdegi Dimashtyń fanattary biletterdi jantalasa satyp alyp jatyr. Onyń aitýynsha, 16 elden, tipti Afrika qurlyǵynan da biletti satyp alýshylar bolypty.
"Biletterdi satyp alýshylardyń geografiialyq aýqymy keń. Biz oǵan tańǵalǵan joqpyz. Oǵan daiyn boldyq. Kontsertke daiyndyqty bastamas buryn Dimashtyń fan toptarymen bailanysta boldyq. Qazirgi ýaqytta biletter Qazaqstan, Resei, AQSh, Qytai, Ulybritaniia, Frantsiia, Germaniia, Japoniia, Niderlandy, Rýmyniia, Polsha, Túrkiiaǵa satyldy. Eń alys elderden Kanada, Avstraliia, Braziliia, Meksika, Afrika qurlyǵynyń da memleketteri bar", - dedi tóraǵa.
Onyń aitýynsha, Dimashtyń Máskeýdegi kontsertine 50 elden jankúierleri kelgen. Elordadaǵy kontsertte jankúierlerdiń sany odan da kóp bolady degen úmit bar.
«Qosymsha jańa ánder oryndalatyn bolady. Shoý kinetikalyq stilde qurylǵan, onyń obrazyna deiin imidjmeikerlermen keńinen oilastyrylǵan. Ár nómir - ortaq ideiany jetkizetin jeke oqiǵa, shaǵyn spektakl dese bolady. Qazirgi sátte barlyq tehnikalyq jaǵdailar, mýltimediialyq sheshimder, sahnanyń árlenýi, dybys pen jaryq máselesi sheshildi. Endi dekoratsiia men rekvizit qarastyrylyp jatyr. Kontserttin tv nusqasyn sapaly túsirý jumystary da oilastyrylýda, aldaǵy 3 aiǵa jospar qurylǵan. Shyǵarmashylyq top mýzykalyq materialdarmen, qoiylym jumystary men grafikalyq sheshimder tolyq iske asyrylyp jatyr. Kontsertke qatysatyn ár túrli janrdaǵy bishiler tobyna arnaiy kasting júrgizildi. Kasting qorytyndysy boiynsha halyqaralyq alańdarda óner kórsetken elimizdiń eń myqty bishileri qatysatyn boldy», - deidi ol.
Sondai-aq, Erlan Karinniń aitýynsha, «Qazaqstan» ulttyq arnasy ánshi Dimash Qudaibergen týraly derekti film túsirýdi bastap ketken.
«Dimashtyń Nur-Sultanda ótetin kontsertinen basqa taǵy bir jobamyz - ánshi týraly derekti film. Ol jóninde biz bir ýaqytta kelistik. Ótken jyly Dimashtyń kontsertin uiymdastyrý jóninde aqyldasyp jatqan ýaqytta, derekti film túsirsek degen usynys aitqan edik. Onyń shyǵarmashylyǵyna qyzyǵýshylyq óte úlken», - dedi «Qazaqstan» RTRK» AQ basshysy Erlan Tynymbaiuly.
Onyń aitýynsha, ánshiniń kelisimin alǵannan keiin shaǵyn shyǵarmashylyq top jumysqa kirisip ketken.
«Bul filmde buryn jariialanbaǵan túrli beinematerialdar kórsetiletin bolady. Oǵan daiyndyq barysynda bizdiń komanda ánshiniń Máskeýdegi kontsertine bardy. Áriptesterimen arnaiy suhbattar túsirdi. Máskeýdegi kontsertinen keiin Qytaiǵa saparǵa attanyp, Hýnan arnasyndaǵy úlken shoýǵa qatysty. Biz shoýdyń túsirilimine de qatysyp, ol jaqta da Qytaidaǵy dostary men áriptesteri tarapynan suhbattardy túsirdik. Árine, negizgi túsirilim Nur-Sultanda 29 maýsymda ótetin kontsertine bailanysty boldy. Oqiǵa jelisi osynyń negizinde qurylady. Bul - Dimashtyń eń úlken kontserti. Álbette, Dimashtyń álemniń ár túkpirinde kontserti ótip jatyr. Biraq, bul eń aýqymdy kontserti bolady dep oilap otyrmyz», - deidi Erlan Qarin.
Esterińizge sala keteiik, Dimash Qudaibergen Nur-Sultan qalasynyń týǵan kúnine orai Qazaqstan telearnasynyń shyǵarmashylyq ujymymen birlesip, elordada jeke kontsert beredi. "Arnaý" atty án keshi "Astana-Arena" stadionynda 29 maýsymda ótedi.
2017 jyly Dimashtyń alǵashqy "Bastaý" kontserti elordada ótken bolatyn.
