تانىمال ەنشٸ ديماش قۇدايبەرگەننٸڭ ەلوردادا ٶتەتٸن كونتسەرتٸنە بيلەتتەردٸڭ باسىم بٶلٸگٸ ساتىلىپ كەتكەن, دەپ حابارلايدى "ۇلت اقپارات" وتاندىق اقپارات اگەنتتٸكتەرٸنە سٸلتەمە جاساپ.
بۇل تۋرالى ورتالىق كوممۋنيكاتسييالار قىزمەتٸندە ٶتكەن بريفينگتە Qazaqstan تەلەراديوكورپوراتسيياسىنىڭ تٶراعاسى ەرلان قارين مەلٸم ەتتٸ.
"18 ناۋرىزدا ديماشتىڭ كونتسەرتٸنە بيلەتتەر ساتىلا باستادى. كٶرەرمەندەر تاراپىنان قىزىعۋشىلىق جوعارى. ساتىلىمعا شىققان العاشقى كٷنٸ 6926 بيلەت (30%) ساتىلعان. بٸر اپتادان كەيٸن بيلەتتەر ساتىلىمى 11099-عا (48,2%) جەتكەن. بٷگٸندە ساتىلىم 70 پايىزعا جەتتٸ", - دەدٸ ول.
سونىمەن قاتار ەرلان قارين اتاپ ٶتكەندەي, تٷرلٸ ەلدەردەگٸ ديماشتىڭ فاناتتارى بيلەتتەردٸ جانتالاسا ساتىپ الىپ جاتىر. ونىڭ ايتۋىنشا, 16 ەلدەن, تٸپتٸ افريكا قۇرلىعىنان دا بيلەتتٸ ساتىپ الۋشىلار بولىپتى.
"بيلەتتەردٸ ساتىپ الۋشىلاردىڭ گەوگرافييالىق اۋقىمى كەڭ. بٸز وعان تاڭعالعان جوقپىز. وعان دايىن بولدىق. كونتسەرتكە دايىندىقتى باستاماس بۇرىن ديماشتىڭ فان توپتارىمەن بايلانىستا بولدىق. قازٸرگٸ ۋاقىتتا بيلەتتەر قازاقستان, رەسەي, اقش, قىتاي, ۇلىبريتانييا, فرانتسييا, گەرمانييا, جاپونييا, نيدەرلاندى, رۋمىنييا, پولشا, تٷركيياعا ساتىلدى. ەڭ الىس ەلدەردەن كانادا, اۆسترالييا, برازيلييا, مەكسيكا, افريكا قۇرلىعىنىڭ دا مەملەكەتتەرٸ بار", - دەدٸ تٶراعا.
ونىڭ ايتۋىنشا, ديماشتىڭ مەسكەۋدەگٸ كونتسەرتٸنە 50 ەلدەن جانكٷيەرلەرٸ كەلگەن. ەلورداداعى كونتسەرتتە جانكٷيەرلەردٸڭ سانى ودان دا كٶپ بولادى دەگەن ٷمٸت بار.
«قوسىمشا جاڭا ەندەر ورىندالاتىن بولادى. شوۋ كينەتيكالىق ستيلدە قۇرىلعان, ونىڭ وبرازىنا دەيٸن يميدجمەيكەرلەرمەن كەڭٸنەن ويلاستىرىلعان. ەر نٶمٸر - ورتاق يدەيانى جەتكٸزەتٸن جەكە وقيعا, شاعىن سپەكتاكل دەسە بولادى. قازٸرگٸ سەتتە بارلىق تەحنيكالىق جاعدايلار, مۋلتيمەدييالىق شەشٸمدەر, ساحنانىڭ ەرلەنۋٸ, دىبىس پەن جارىق مەسەلەسٸ شەشٸلدٸ. ەندٸ دەكوراتسييا مەن رەكۆيزيت قاراستىرىلىپ جاتىر. كونتسەرتتٸن تۆ نۇسقاسىن ساپالى تٷسٸرۋ جۇمىستارى دا ويلاستىرىلۋدا, الداعى 3 ايعا جوسپار قۇرىلعان. شىعارماشىلىق توپ مۋزىكالىق ماتەريالدارمەن, قويىلىم جۇمىستارى مەن گرافيكالىق شەشٸمدەر تولىق ٸسكە اسىرىلىپ جاتىر. كونتسەرتكە قاتىساتىن ەر تٷرلٸ جانرداعى بيشٸلەر توبىنا ارنايى كاستينگ جٷرگٸزٸلدٸ. كاستينگ قورىتىندىسى بويىنشا حالىقارالىق الاڭداردا ٶنەر كٶرسەتكەن ەلٸمٸزدٸڭ ەڭ مىقتى بيشٸلەرٸ قاتىساتىن بولدى», - دەيدٸ ول.
سونداي-اق, ەرلان كاريننٸڭ ايتۋىنشا, «قازاقستان» ۇلتتىق ارناسى ەنشٸ ديماش قۇدايبەرگەن تۋرالى دەرەكتٸ فيلم تٷسٸرۋدٸ باستاپ كەتكەن.
«ديماشتىڭ نۇر-سۇلتاندا ٶتەتٸن كونتسەرتٸنەن باسقا تاعى بٸر جوبامىز - ەنشٸ تۋرالى دەرەكتٸ فيلم. ول جٶنٸندە بٸز بٸر ۋاقىتتا كەلٸستٸك. ٶتكەن جىلى ديماشتىڭ كونتسەرتٸن ۇيىمداستىرۋ جٶنٸندە اقىلداسىپ جاتقان ۋاقىتتا, دەرەكتٸ فيلم تٷسٸرسەك دەگەن ۇسىنىس ايتقان ەدٸك. ونىڭ شىعارماشىلىعىنا قىزىعۋشىلىق ٶتە ٷلكەن», - دەدٸ «قازاقستان» رترك» اق باسشىسى ەرلان تىنىمبايۇلى.
ونىڭ ايتۋىنشا, ەنشٸنٸڭ كەلٸسٸمٸن العاننان كەيٸن شاعىن شىعارماشىلىق توپ جۇمىسقا كٸرٸسٸپ كەتكەن.
«بۇل فيلمدە بۇرىن جارييالانباعان تٷرلٸ بەينەماتەريالدار كٶرسەتٸلەتٸن بولادى. وعان دايىندىق بارىسىندا بٸزدٸڭ كوماندا ەنشٸنٸڭ مەسكەۋدەگٸ كونتسەرتٸنە باردى. ەرٸپتەستەرٸمەن ارنايى سۇحباتتار تٷسٸردٸ. مەسكەۋدەگٸ كونتسەرتٸنەن كەيٸن قىتايعا ساپارعا اتتانىپ, حۋنان ارناسىنداعى ٷلكەن شوۋعا قاتىستى. بٸز شوۋدىڭ تٷسٸرٸلٸمٸنە دە قاتىسىپ, ول جاقتا دا قىتايداعى دوستارى مەن ەرٸپتەستەرٸ تاراپىنان سۇحباتتاردى تٷسٸردٸك. ەرينە, نەگٸزگٸ تٷسٸرٸلٸم نۇر-سۇلتاندا 29 ماۋسىمدا ٶتەتٸن كونتسەرتٸنە بايلانىستى بولدى. وقيعا جەلٸسٸ وسىنىڭ نەگٸزٸندە قۇرىلادى. بۇل - ديماشتىڭ ەڭ ٷلكەن كونتسەرتٸ. ەلبەتتە, ديماشتىڭ ەلەمنٸڭ ەر تٷكپٸرٸندە كونتسەرتٸ ٶتٸپ جاتىر. بٸراق, بۇل ەڭ اۋقىمدى كونتسەرتٸ بولادى دەپ ويلاپ وتىرمىز», - دەيدٸ ەرلان قارين.
ەستەرٸڭٸزگە سالا كەتەيٸك, ديماش قۇدايبەرگەن نۇر-سۇلتان قالاسىنىڭ تۋعان كٷنٸنە وراي Qazaqstan تەلەارناسىنىڭ شىعارماشىلىق ۇجىمىمەن بٸرلەسٸپ, ەلوردادا جەكە كونتسەرت بەرەدٸ. "ارناۋ" اتتى ەن كەشٸ "استانا-ارەنا" ستاديونىندا 29 ماۋسىمدا ٶتەدٸ.
2017 جىلى ديماشتىڭ العاشقى "باستاۋ" كونتسەرتٸ ەلوردادا ٶتكەن بولاتىن.
