Qazaqstandyq tanymal ánshi Dimash Qudaibergenniń tuńǵysh qazaqsha albomy jaryqqa shyǵady, dep habarlaidy "Ult aqparat".
«Karantinde elge kelip, eń alǵashqy qazaqsha albomymdy jinaqtaýdyń sáti tústi. Qasymdaǵy kisini tanystyrmasa da bolady. Ataqty Marqum Batyrhan aǵamyzdyń repertýaryndaǵy «Otan ana», «Saǵym dúnie», «Qairan kóńil-ai» syndy talǵamy biik kórermenniń júregin jaýlaǵan ánderdiń avtory, naǵyz qazaq kompozitorlarynyń ustazy - Qýat aǵamyzben stýdiiada jumys barysynda» dep jazdy Dimash Qudaibergen Instagram paraqshasynda.
Ánshiniń aitýynsha, ol kompozitor Qýat Shildebaevpen 3 jyldan beri kezdese almai kelgen.
«Men Beijińde júrgendikten Qýat aǵa ekeýmiz 3 jyl boiy kezdese almai endi ǵana kezdesýdiń sáti tústi. Osyndai uly kompozitormen jumys jasaýdyń ózi úlken baqyt qoi» dep atap ótti oryndaýshy.
Eske sala keteiik, keshe Dimash Qudaibergen men QR Bala quqyqtary jónindegi ýákil Arýjan Sain BUU Jahandyq kommýnikatsiialar departamentiniń Qazaqstandaǵy ókili Vlastimil Samekpen kezdesken bolatyn.
