Tanymal ánshi Dimash Qudaibergen "Jańa tolqyn-2021" halyqaralyq baiqaýynyń ashylýynda óner kórsetti, - dep habarlaidy "Ult aqparat".
Dimash baiqaýdyń ashylýynda ótken jyldyń 8 naýryzynda dizainer Valentin Iýdashkinniń mereitoiynda tusaýy kesilgen Your Love kompozitsiiasyn oryndady. Sondai-aq, ol osy keshte Igor Krýtoidyń aqyn Sharon Vonnyń óleńine jazǵan Stranger ánin alǵash ret oryndady. Shyǵarma qobyz únimen súiemeldendi.
VIDEO
Biyl "Jańa tolqynnyń" finalynda álemniń 9 elinen 11 qatysýshy bas júldege talasady. Baiqaýǵa qatysýshylardy Igor Krýtoi, Filipp Kirkorov, Svetlana Loboda, Sergei Lazarev, Artik-Asti, Leonid Agýtin, Dima Bilan jáne Dimash Qudaibergen sekildi qazylar alqasy baǵalaidy.
"Bul - meniń qazylar alqasyndaǵy alǵashqy tájiribem emes. Buǵan deiin men Qytaidaǵy Super Vocal jobasynda, jaqynda Slavian bazarynda qazylar alqasynyń qatarynda bolǵanmyn. "Jańa tolqyn" baiqaýynda alǵash ret qazylar alqasynyń múshesi boldym. Bul jaýapkershilikti qajet etetin qýantarlyq jait. Árine, men óz elimniń ókilderi úshin jankúier bolamyn, biraq kómektespeimin. Óitkeni baiqaýda printsip ornaǵan, sonyń arqasynda baiqaý kóp jyl boiy ótip jatyr", - dedi Dimash.
Festivaldiń qyzyl kileminde Dimash qobyzshy Oljas Qurmanbekpen birge óner kórsetti.
Aita keteiik, "Jańa tolqyn-2021" baiqaýyna Qazaqstan atynan Mezzo toby qatysady. Bul top Qazaqstandaǵy klassikalyq krossover baǵytynda jumys isteitin alǵashqy vokaldyq top.
Top 2012 jyly qurylǵan. Quramynda: Jasulan Sydyqov, Jánibek Seidahmetov, Asan Nurbergenov jáne Meiirhan Janturǵanov bar. Ujym 2012 jyly X Factor Kazakhstan konkýrsynda 2-oryn alyp, tanymal boldy.
