Qazaqstandyq ánshiler Dimash Qudaibergen men Daneliia Tóleshova AQSh-ta ótetin «THE WORLD'S BEST» talanttar baiqaýyna qatysady, dep habarlaidy QazAqparat.
Bul týraly Gia Noortas laqap atymen tanymal kinoprodiýser, aktrisa Gaýhar Nurtas óziniń áleýmettik jelidegi paraqshasynda aitty.
«THE WORLD'S BEST» talanttar baiqaýynyń halyqaralyq qazylar alqasyn qarsy alyńyzdar. Men Qazaqstannyń atynan tórelik etemin. Dimash pen Daneliiaǵa jankúier bolamyn. Qazylardyń árqaisysy - óz isiniń has sheberleri. Bul qatardan oryn alý ońai emes jáne úlken bedel», - deidi Gaýhar Nurtas.
«THE WORLD'S BEST» - álemniń barlyq elinen barlyq janrdaǵy ónerpazdardy qabyldaityn jahandyq talanttar baiqaýy. Úmitkerler túrli salada eńbek etetin 50 tájiribeli tóreshige unaýy tiis. Baiqaý sońynda jalǵyz jeńimpaz anyqtalady.
Ádil qazylar quramynda aktrisa, «Altyn globýs» iegeri Driý Berrimor, telejúrgizýshi, «Emmi» syilyǵyn jeńip alǵan RýPol Charlz, kantri-mýzyka juldyzy Feit Hill jáne akter, prodiýser, telejúrgizýshi Djeims Korden bar.
Baiqaý 3 aqpanda CBS i CBS All Access telearnalarynan kórsetile bastaidy.
Eske salsaq, 2016 jyly Gaýhar Nurtas qazaqstandyq-amerikalyq «Toqal» filmine prodiýserlik etken bolatyn. Qazir ol AQSh-tyń Los-Andjeles qalasynda turady.
