Qazaq ánshisi Dimash Qudaibergen Angliiada ótetin kontsertten túsken qarajat Qazaqstannyń jas talanttarynyń halyqaralyq mańyzdy baiqaýlarǵa qatysýyn qoldaýǵa jumsalatynyn jariia etti, dep habarlaidy "Ult aqparat".
Eske sala ketsek, Dimash Qudaibergen Angliiadaǵy áigili «Royal Festival Hall» zalynda jeke keshin ótkizetinin keshe habarlaǵan edik.
Búgin ánshi óziniń Instagram paraqshasynda kontsertke qatysty barlyq resmi aqparat @kazauenderi akkaýntynda jariialanatynyn jazdy.
«Ýáde etilgendei, men sizderge Ulybritaniiadaǵy Qazaqstan mádenieti kúnderi aiasynda 19 qarasha kúni Londonda qaiyrymdylyq maqsatta ótetin kontsertim jóninde aqparat beremin. Kommertsiialyq emes kontserttiń uiymdastyrýshysy - Qazaqstan Respýblikasynyń Mádeniet jáne sport ministrligi. Shara Ulybritaniiadaǵy Qazaqstan Respýblikasy elshiliginiń qoldaýymen ótedi. Jinalǵan barlyq qarajat Qazaqstannyń jas talanttaryn halyqaralyq mańyzdy baiqaýlarǵa qatystyrýdy qoldaý úshin jumsalady. Kontsert ótetin «Royal Festival Hall» mekemesi tirkeý júrgizýmen ainalyspaidy. Kontsertke qatysty barlyq resmi aqparat @kazauenderi akkaýntynda», - dep jazdy ol óziniń Instagram paraqshasynda.
