Londondaǵy keremet kontsertinen soń ánshi biraqatar sheteldik BAQ ókilderine suhbat berdi, dep habarlaidy "Ult aqparat".
19 qarashada Londonda Ulybritaniiadaǵy Qazaqstan mádenieti kúnderi aiasynda Dimash Qudaibergenniń jeke kontserti ótti. Bul sharany Qazaqstan Respýblikasynyń Mádeniet jáne sport ministrligi uiymdastyryp, Ulybritaniia men Soltústik Irlandiia Birikken Koroldigindegi Qazaqstan Respýblikasy Elshiligi qoldaǵan bolatyn.
«Indigo at the O2» kontsert zalyndaǵy triýmfynan soń, Dimash Qudaibergen halyqaralyq jetekshi BAQ ókilderimen kezdesý úshin Londonda taǵy 2 kún boldy. Dimash ár suhbatynda Qazaqstan jáne ulttyq salt-dástúrler týraly qazaq tilinde aityp berdi. Ánshiniń aitýynsha, ol álemge týǵan eliniń mádenietin ana tilinde jetkizetinin maqtan tutady. Dimash Qudaibergen Londonda ótken óziniń alǵashqy jeke kontsertin uiymdastyrýshy QR Mádeniet jáne sport ministrligine alǵys bildirdi.
Sondai-aq, osy kúnderi ánshi Ulybritaniia men Soltústik Irlandiia Birikken Koroldigindegi Qazaqstan Respýblikasynyń Tótenshe jáne Ókiletti elshisi Erlan Ydyrysovpen kezdesti. Elshi myrza Dimashtyń búkil álemde Qazaqstan elshisi ekenin jáne elimizdiń bedelin álemdik deńgeide kóterip júrgenin atap aitty.
Sol kúni ánshi Londondaǵy qazaqstandyq stýdenttermen kezdesti. Kezdesý Ulybritaniia men Soltústik Irlandiia Birikken Koroldigindegi Qazaqstan Respýblikasy elshiliginde ótti. Mýzykantpen kezdesýge san alýan salanyń bolashaq mamandary keldi. Olar tosyn fotosessiia ótkizip, ózderin qyzyqtyryp júrgen suraqtardy qoidy.
Elshiliktiń dálizinde Dimash jinalǵandarǵa arnap, fortepianoda birneshe súiikti shyǵarmasyn oryndap berdi.
Álemdik jetekshi redaktsiialarǵa arnalǵan suhbat seriiasyn Dimash Qudaibergen BBC televiziiasy men radiosyn aralaýdan bastady. Britandyq VVS jalpyulttyq qoǵamdyq teleradio taratylymy uiymynyń stýdiiasynda Dimash qazaq tilinde biregei suhbat berip, óz shyǵarmashylyǵymen bólisti. «BBC World Service» radiostantsiiasynda mýzykant «Cultural Frontline» senbilik shoýy úshin óziniń tabys jolyndaǵy tarihymen bólisti. Baǵdarlama júrgizýshisi Tina Daheli ánshimen onyń mýzykalyq joly týraly áńgimelesti. Radiostantsiianyń jahandyq aptalyq aýditoriiasy - 75 million tyńdarman.
Britandyq «The Independent» internet-baspasyna bergen suhbatynda qazaqstandyq óz mýzykasy men shyǵarmashylyq joly týraly áńgimeledi. Suhbat radioǵa arnalǵan podkast túrinde ótti. Tilshini qazaqstandyq ánshiniń qai jerde demalǵandy unatatyny qyzyqtyryp, osyǵan qatysty suraqtar qoidy. Dimash jumys barysymen barǵan memleketterimen bólisip, shetelde eshqashan demalmaǵanyn aitty.
«Qazaqstanda Aqtóbe degen shaǵyn qala bar. Sol jerde meniń otbasym, ata-ájem, búkil týysym turady. Sol jerde men keremet demalamyn», - dep ashyq aitty ánshi.
Odan bólek, jas ánshi londondyq «Candid» jýrnalynyń tilshisi Adam Zorganimen kezdesti. Adam «Indigo at the O2» zalynda ótken Dimashtyń kontsertinde bolǵanyn jáne qazaqstandyqtyń shyǵarmasyna tánti ekenin aitty.
«1883» interaktivti mýltimedialyq platformasyna Dimash óz shyǵarmasy men bolashaqqa qurǵan josparlary týraly aityp berdi. Portal redaktsiiasy sándi mýzyka, kino, saiahat jáne óner álemindegi sońǵy jańalyqtardy taratýmen ainalysady.
Qazaqstandyq ánshi Reseilik TASS jetekshi aqparattyq agenttiginiń tilshilerimen de kezdesý ótkizdi. Suhbat barysynda Dimash Igor Krýtoimen birge jasap jatqan jumystary jáne reseilik kompozitormen bolashaqqa qurǵan shyǵarmashylyq josparlary týraly tolyq aqparat berdi.
Britandyq tanymal fotograf Maikl Donald Dimash Qudaibergen úshin fotosessiia jasady. Maikldyń jumystarynyń qatarynda amerikalyq kinorejisser Martin Skorsezeniń, «The Rolling Stones» rok-tobynyń vokalisi Mik Djaggerdiń, braziliialyq fýtbolshy Pele men basqa da ataqty adamdardyń fotosýretteri bar.
Sondai-aq, osy kúnderi ánshi Ulybritaniiadaǵy «World History Archive» Bas direktory Aleksandr Goldbergpen kezdesti. Aleksandr Dimash Qudaibergen týraly avtobiografiia jazýdy josparlap otyr. Kezdesý janǵa jaily jaǵdaida ótti, ol Dimashqa qazaq dombyrashysy beinelengen fotosýretti syiǵa tartty. Bul jumystyń ataýy joq. Alaida, ol 1890 jyly jasalǵany belgili.
Qazaqstandyq ánshiniń shyǵarmasy tilshilerdiń ǵana emes, ulybritaniialyq juldyzdardyń da qyzyǵýshylyǵyn týǵyzdy. Kontsert kórermenderi qatarynda jergilikti juldyzdar da boldy. Dimash óner kórsetken kúni ánshige qoldaý kórsetý úshin Angliiadaǵy ataqty ánshi Taliia Storm keldi. Ol dostarymen birge Dimashtyń aldaǵy kontsertine sáttilik tiledi. Angliialyq ánshi kontsert barysyn óz akkaýntyna jazylǵandarǵa arnap, áleýmettik jelidegi paraqshasynda kórsetti. Kontsertten soń olar hat almasyp, dostyq bailanys ornatty.
Londondaǵy esten ketpes kúnderden soń Dimash Qudaibergen Otanyna oraldy.
