18 aqpanda Perseverance atty jańa rover Mars betine qondy. Ǵylymi jabdyqtarmen qatar, ol Qyzyl planetaǵa milliondaǵan adamnyń esimderin jetkizdi. Olardyń arasynda Dimash Qudaibergenniń esimi de bar, dep habarlaidy dimashnews.com saity.
Perseverance roveri 2020 jyldyń 30 shildesinde alys saparǵa attanyp, jeti aiǵa jýyq ýaqyttan keiin Qyzyl planetaǵa sátti qondy.
Fox News–ke silteme jasap Ruherald.com saitynyń jazýynsha, Perseverance – tehnologiialyq jaǵynan eń damyǵan robot jáne ony Marsqa NASA jiberip otyr.
2,7 milliard dollar turatyn robot bir marstyq kún ishinde ortasha eseppen 200 metrdi baǵyndyryp otyrady. Ol uzyndyǵy shamamen 2 metr manipýliator qolymen, burǵylaý jáne ǵylymi qurylǵylarmen jabdyqtalǵan. Onyń ishinde joǵary tehnologiialy túsirilim kamerasy, aýa raiyn ólsheýge jáne shańdy baqylaýǵa arnalǵan sensorlar, rentgen júiesi jáne taý jynystarynyń himiialyq quramyn ólsheýge arnalǵan kamera júiesi bar.
Sondai-aq, Perseverance Marsqa koronavirýs infektsiiasymen kúresip jatqan dárigerlerdiń qurmetine jasalǵan eskertkish taqtany, sondai-aq NASA-nyń «Marsqa óz esimińdi jiber» aktsiiasyna qatysqan 11 millionǵa jýyq adamnyń aty jazylǵan tyrnaq kólemindegi 3 kremnii chipin jetkizdi.
AQSh, Túrkiia, Reseidi qosa alǵanda, túrli elderdegi jankúierler taqtaishaǵa Qazaqstandyq oryndaýshy Dimash Qudaibergenniń esimin jazýdy usyndy.
Perseverance roveriniń Marstaǵy maqsaty – ejelgi ómirdiń belgilerin izdeý jáne planetanyń betin zertteý. Onyń missiiasy shamamen eki jylǵa sozylady dep kútilýde.
