Tanymal ánshi Dimash Qudaibergen barlyq jankúierlerin koronavirýs indeti kezinde úiden shyqpaýǵa shaqyrdy, dep habarlaidy "Ult aqparat".
Ánshi beineúndeýin Instagram-daǵy paraqshasynda jariialady. «Men sizderdi qatty saǵynyp, video jazýdy sheshtim. Ótinemin, úiden shyqpańyzdar. Bul - ázil emes, óte kúrdeli jait, úiden shyqpańyz. Bul virýsty jeńetinimizge senemin, sebebi bári de ótkinshi. Men oǵan senemin, men sizderge senemin, ózderińizdi qorǵap júrińizder. Biz úide otyrýǵa tiispiz», - dedi ánshi.
Dimash bul videony úide, Qazaqstan elordasynda jazyp otyrǵanyn, úide inilerimen Play station oinap otyrǵanyn aitty.
Aldymen aǵylshynsha sóilegen Dimash sóz sońyn qazaq tilinde qorytyndylady.
«Sizderge eń aldymen densaýlyq tileimin. Kúlli álemdi bilegen aýyr indettiń aldyn alý maqsatynda atqarylyp jatqan barlyq saqtyq sharalaryna nemquraidy qaramaýǵa shaqyramyn. Sál tózimdilik tanytyńyzdar! Alla bárimizge sabyr bersin! Elimiz aman, jurtymyz tynysh bolsyn. Bul da bir ótpeli dáýren. Biz bul dertti jeńip shyǵamyz», - dedi Dimash.
