Tanymal ánshi Dimash Qudaibergen týraly kitap jaryqqa shyqty. Bul týraly kitap avtory, filologiia ǵylymdarynyń kandidaty, EUÝ dotsenti, belgili aqyn Ońaigúl Turjan málim etti.
"Mýzyka týraly tek mýzykatanýshylar jazsyn degen Ereje bar bolsa, men ol Erejeden keshirim suraimyn. Dimash jandúniemizdegi jansyz qalǵan dúnielerimizdi qozǵap jiberdi. Biz Dimashty tyńdai júrip, án tyńdaýdyń da jańa orbitasyna kóterildik. Imidj jaily jaq ashpaǵan kezeńderimizde qansha nárse joǵalttyq ózi? Dimashtyń imidji jaily jazbaý múmkin bolmai qaldy. Biz tipti kórermen týraly bir aýyz áńgime aitpappyz. Basqa halyqtyń kórermeni kórermen siiaqty da, bizdiń qazaqtyń kórermeni solardyń kórermenine qol soǵýshy siiaqty. Endigi jerde olai bolmaidy. Zalda otyrǵan myna Siz de, sol zaldan shyǵyp bara jatqan Ol da ónerge qanat bitirgen qudyretter. Dimashtyń ónerine qol soqqan qol shapalaǵymyzdyń úni kúlli álemdi jalt qaratqandai. Biz tipti Dimash arqyly ózimizdi basqasha sezine bastadyq. Al Dimashtyń ózi sheberligin qalai shyńdady? Jas talanttardy qabiletin syndyryp almai, sheberlik shyńyna jetkizýge bola ma? Meniń «Dimash» atty esse-kitabym osy jáne basqa da máselelerdi qozǵady. Oi qosyp, pikir bólisken Dimashtyń ata-anasy Qanat pen Svetlanaǵa zor alǵysymdy aitamyn. Bul jańa týyndym óleń emes, esse. Joǵaryda aitylǵan máselelerdi qozǵaǵan jańa stildegi dúnie. Oqimyn deseńiz – marhabbat" dep jazdy ol feisbýktegi paraqshasynda.
Kitap taiaý kúnderi «Meloman», «Flip.kz» kitap saýda jelisi arqyly saýda oryndaryna túsedi.
"Mundai jelidegi dúkeni joq qala, aýyldardaǵy oqyrmandarym feisbýk, instagram jelileri arqyly jekege ózime habarlassa bolady, kómekshi qyzdarym satýdy uiymdastyryp jatyr", deidi kitap avtory.
Aita ketsek, Dimash Qytaidan úlken jeńispen elge oralǵan edi. Ánshini Qazaqstan Respýblikasynyń prezidenti Nursultan Ábishuly arnaiy qabyldap, batasyn berdi.
