Qytaidyń Datuń qalasynda ótken Djeki Channyń Besinshi halyqaralyq ekshn filmder aptalyǵynyń shymyldyǵyn qazaqstandyq tanymal ánshi Dimash Qudaibergen ashty, dep habarlaidy QazAqparat.
Ánshi Instagram-daǵy paraqshasyna festivaldiń ashylý saltanatynda aitqan ániniń videosyn jariialap, «Djeki Chan aǵamyzdyń keshinen» dep jazdy.
Videodan Dimashtyń ónerine uiyǵan jurttyń birge ándetkeni kórinedi.
Eske sala keteiik, Dimash pen Djeki Chan burynnan jaqsy tanys. Qazaq ánshisi Qytaida ótken I am Singer jobasynda milliondaǵan qaýymnyń júregin jaýlaǵan bolatyn. Sonda áigili aktermen kezdesip, iyǵyna qazaqtyń shapanyn jaýyp, qońyr úndi dombyrasyn da syiǵa tartqan edi.
Sol joly Dimash Instagram paraqshasyna: «Búgin meniń ómirimde tarixi este qalatyn erekshe kún! Ataqty akter Djeki Chan myrza meni teledidardan kórip, kezdesýge shaqyrdy! Kezdesýde akter maǵan óziniń ekskliýzivti kúrteshesin jáne arnaiy firmalyq án tyńdaý qurylǵysyn syiǵa tartty! Al men akterge qazaqtyń shapanyn jaýyp, dombyra syiladym! Dombyramen bir kúi shertip berýimdi ótingen Djeki Chanǵa Nurǵisanyń Álqisasynan shashý shashtym! Óz kezeginde akter maǵan sońǵy »Kung Fu Yoga« kinokartinasyndaǵy bi qimyldaryn úiretti. Bala kezimnen beri kele jatqan súiikti akterim maǵan óz aqyl- keńesterin berip, shyǵarmashylyǵymdy baqylaitynyn aitty. Sóz sońynda, barsha Qazaqstan xalqyn jańa jyl merekesimen quttyqtap, ádemi lebiz-tilegin bildirdi! Kelesi kezdesýdi asyǵa kútemiz! Armandar oryndalady!», - dep jazǵan bolatyn.
