Dimash Qudaibergen Jastar jyly aiasynda Astanada kontsert beredi, dep habarlaidy QazAqparat tilshisi.
OKQ-da ótken búgingi baspasóz máslihatynda «Qazaqstan» RTRK AQ tóraǵasy Erlan Qarin aldaǵy kontsert týraly tolyǵyraq aityp berdi.
«Biz sizdermen úlken mańyzdy jańalyqty bóliskimiz keledi. Biz óz tarapymyzdan talantty jastardy qoldaýǵa daiynbyz. Onyń ústine ózderińiz biletindei, biylǵy jyl Jastar jyly dep jariialanǵan bolatyn. Dimash - elimizdiń, halqymyzdyń birtýar azamaty, qazaqtyń óneri arqyly elimizdiń atyn búkil álemge tanytyp júrgen talantty tulǵa. Bunyń aldynda Dimash Ulttyq arnadaǵy jańa jyldyq shoýǵa qatysqan bolatyn. Al búgingi aitylyp jatqan joba boiynsha biz Dimashpen birneshe ret kezdesip, aqyldasqan edik», - dedi Erlan Qarin.
Onyń aitýynsha, «Qazaqstan» korporatsiiasy «Arnaý» kontsertiniń búkil uiymdastyrý, túsirilim jumystaryn qolǵa alyp, qoldaý kórsetedi.
«Arnaý» atty shyǵarmashylyq kontsertin Dimash Astana kúnine orailastyrmaq. Aýqymdy mýzykalyq shoý qazaqstandyqtar men myńdaǵan ónersúier qaýymdy Astana tórinde jinaityn bolady», - dedi Erlan Qarin.
Kontsert 4-5 bólimnen turady dep josparlanyp otyr. Baǵdarlama qazaqtyń halyq ánderi, qazaqstandyq jáne sheteldik kompozitorlardyń shyǵarmalarymen qatar zamanaýi árleýmen oryndalǵan Dimashtyń avtorlyq týyndylary usynylatyn bolady. Sondai-aq, kontsertte qazaq, aǵylshyn, frantsýz, hanzý, orys, italian tilderinde ánder shyrqalady.
«Biz osy ýaqyttyń ishinde osy jobanyń negizgi qurylymy, mazmuny jaily pikir almasyp, kontseptsiiasyn túzedik. Qazir naqty uiymdastyrý jumysy bastaldy», - dedi Erlan Qarin.
