Ánshi Dimash Qudaibergenge «Aqtóbe oblysynyń qurmetti azamaty» ataǵyn berý usynysyn oblystyq máslihat depýtattary biraýyzdan qoldady, dep habarlaidy "Ult aqparat".
«Aqtóbe oblysynyń qurmetti azamaty» ataǵy qoǵamdyq birlestikter men depýtattardyń usynysymen qaralyp, talqylandy. Barlyǵy 10 adamnyń aty-jóni atalǵanymen, tórteýi laiyqty dep tanyldy. Olar - filosofiia ǵylymdarynyń doktory, professor Amangeldi Aitaly, filologiia ǵylymdarynyń doktory, professor Rábiǵa Syzdyq, «Atameken» kásipkerler men jumys berýshiler qaýymdastyǵy» qoǵamdyq birlestiginiń basqarma tóraǵasy Esimhan Qurmanǵazin. Qurmetti azamattar qatarynda búgin Niý-Iorktegi kontsertin anshlagpen ótkizgen Dimash Qudaibergen de bar.
«Dimash Qanatuly - ánshi, sazger. 2004 jyly A.Jubanov atyndaǵy Aqtóbe mýzykalyq kolledjin támamdady. Qazaq ulttyq óner ýniversitetiniń estrada-óner kafedrasynda oqyp jatyr. 2010-2013 jyldary birneshe vokaldyq konkýrstardyń jeńimpazy atandy. Qazaqstanda «Baiqońyr daýystary», «Jas qanat», Ýkrainadaǵy «Vostochnyi bazar», «Slavianskii bazar» baiqaýynyń jeńimpazy. 2014 jyly «Daryn» memlekettik syilyǵynyń laýreaty atandy. 2015 jyly «Jyl ánshisi» bolyp, 2016 jyly «Estrada ártisi» syilyǵyn ielendi. 2017 jyly Qytaida ótken baiqaýda júldegi oryn aldy», - dedi Aqtóbe oblysy ákiminiń apparat jetekshisi Nurjaýǵan Qalaýov.
