Qazaqstandyq ánshi Dimash Qudaibergen «Singer2017» án baiqaýynyń birinshi kezeńinde kigen sahnalyq kiimi 158 890 iýanǵa (7,2 million teńge) satyldy, dep habarlaidy QazAqparat.
Kiim qytailyq mpaimai.jd.com ǵalamtor saýda jelisinde aýktsionǵa shyǵarylǵan. Bastapqy baǵasy 188 iýannan (8 500 teńge) bastalǵan kiimdi satyp alýǵa 19 640 adam qatysyp, 32 adam baǵa kótergen.
Qorytyndysynda kiim 158 890 iýanǵa satylyp, jeńimpazǵa Iphone 6S telefony syiǵa tartylǵan.
Mpaimai.jd.com saitynyń habarlaýynsha, kiimdi Dimash 27 naýryz kúni Shanhai qalasyndaǵy 24-kezekti «China Top music Awards» sharasy kezinde atalmysh saitqa tartý etken. Al sait ataqty ánshiniń kiimin satýdan túsken qarajatty Qytaidaǵy balalar qoryna aýdaryp, kómekke zárý balalarǵa jumsaidy.
