Halyqaralyq balalardy qorǵaý kúninde Aqtóbede Dimash Qudaibergenniń kontserti ótedi. Bul týraly búgin Ortalyq kommýnikatsiialar qyzmetindegi baspasóz máslihatynda Aqtóbe oblysynyń ákimi Berdibek Saparbaev aitty, dep habarlaidy "Ult aqparat".
«1 maýsym, Halyqaralyq balalardy qorǵaý kúninde Dimashtyń bastamasymen úlken kontserttik baǵdarlama uiymdastyrylady. Oǵan Dimashpen birge qazirgi ýaqytta án salyp júrgen sheteldik ánshiler de qatysady», - dedi Berdibek Saparbaev.
Aita keteiik, Aqtóbede 1-3 maýsym aralyǵynda «Baqyty bala - 2018» ashyq balalar vokaldyq festival-baiqaýy ótedi. Baiqaýǵa 10-15 jas aralyǵyndaǵy balalar qatysady. Qazirgi ýaqytta uiymdastyrý komiteti ótinimder qabyldap jatyr. Baiqaýǵa qatysýǵa Grekiia, Resei, Ýkraina, Tatarstan, Qytai jáne Qazaqstannyń vokalisteri ótinish bildirýde. Konkýrstyń ekinshi kezeńi 1 maýsymnan bastalady. Irikteýden ótken qatysýshylar jartylai finalda synǵa túsip, Aqtóbe sahnasynda án shyrqaidy. Sodan keiin shyǵarmashylyq jarystyń finaly ótedi. Finalǵa shyqqan ánshiler Dimash Qudaibergen, Daneliia Tóleshova jáne Lýiza Nurqýatovalarmen birge bir sahnada óner kórsetedi.
Esterińizge sala ketsek, «Singer 2017» án dodasynda ekinshi oryn alǵannan keiin Dimashtyń Qytaida jáne basqa da elderde tanymaldylyǵy arta tústi. 2017 jyly ol Qytaidyń birqatar júldelerin jeńip aldy.
