Foto: t.me/zakonkz
Almaty qalalyq máslihatynyń eks-depýtaty Qairat Qudaibergen men «Dikii Arman» laqap atymen tanymal Arman Jumageldievke qatysty sot protsesi jalǵasyp jatyr, dep habarlaidy QazAqparat agenttigi.
Aldyn ala tyńdaý QR IIM Qylmystyq-atqarý júiesiniń №72 túzeý mekemesiniń tergeý izoliatorynda ótip jatyr. Sotta Qairat Qudaibergen men Arman Jumageldievten bólek taǵy 43 adamnyń isi qaralady. Olardyń bári qańtar oqiǵasy boiynsha kúdikti.
Sot otyrysy onlain jáne oflain rejiminde ótip jatyr. Atap aitqanda, bes aiyptalýshy sot otyrysyna Zoom platformasy arqyly qatystyryldy, onyń ishinde Ulttyq qaýipsizdik qyzmetiniń tergeý izoliatorynda otyrǵan «Dikii Arman» bar.
Arman Jumageldiev pen onyń qorǵaýshylary sottyń ádil ótýin jáne aiyptalýshyǵa sot otyrysyna basqa qatysýshylarmen birge offlain rejimde qatysý múmkindigin berýdi talap etti. Óz kezeginde, sýdia Ashat Áshirbekov sot otyrysynyń nelikten aralas formatta ótip jatqanyn túsindirdi.
«12 qyrkúiekte Almaty prokýratýrasynan sottalýshylar Y., J., Ú. men M.-ǵa qatysty aldyn ala tyńdaý jáne bas sot talqylaýyn beinebailanys rejiminde ótkizý týraly ótinish kelip tústi. Sebebi olardy kezeń-kezeńimen ótkizip, №72 mekemesine ákelý qylmystyq protseske qatysýshylar úshin qaýipti. Sondai-aq, qoǵamdyq tártip buzylýy múmkin. Dál osyndai hat Almaty qalalyq qylmystyq-atqarý júiesi departamentinen de kelip tústi», - dedi Ashat Áshirbekov.
Sýdia zańǵa sáikes negizgi sot talqylaýy sottyń qalypty jumysyn jáne protseske qatysýshylardyń qaýipsizdigin qamtamasyz etetin jaǵdaida júrgiziletinin atap ótti.
«Osy ótinishterdi, hattardy zerttep, sot olardy qanaǵattandyrý qajet dep sanady, óitkeni mundai jaǵdailarda sot óz quzyreti sheginde protseske barlyq qatysýshynyń qaýipsizdigin qamtamasyz etý úshin zańda kózdelgen sharalardy qoldanýǵa mindetti. Dál osy maqsatta sot tórt sottalýshyǵa qatysty aldyn ala tyńdaý sot otyrysyn onlain rejimde ótkizý týraly sheshim qabyldady. ÝUI jaǵdaiynda bir sottalýshy bar. Osy negiz boiynsha sot sheshim qabyldady», - dep jaýap berdi sýdia sottalýshylar men advokattardyń suraqtaryna.
Aiyptalýshylardyń advokattary sot sheshimimen kelispeidi. Olar shuǵyl túrde barlyǵyn mekemege aýystyryp, olarǵa teń quqyq berilýin talap etip otyr. Sottalýshylar protseske qatysýshylarǵa eshqandai qaýip tóndirmeidi dep esepteidi.
Buǵan deiin Almaty qalalyq soty qylmystyq isi boiynsha sot protsesine advokattardyń kirýine kedergi keltirilip jatqany týraly aqparatty joqqa shyǵarǵan bolatyn.
Eske salaiyq, byltyr 7 qańtarda Almatyda politseiler «Dikii Arman» laqap atymen tanymal qylmys áleminiń «bedeldisi» Arman Jumageldievti ustaǵan bolatyn.
Keiin QR Bas prokýratýrasy «Dikii Arman» Ulttyq qaýipsizdik qyzmetiniń tergeý izoliatorynda otyrǵanyn jetkizdi.
Al, Qairat Qudaibergenniń ustalǵany týraly aqparat 2022 jyldyń 22 sáýirde paida bolǵan edi.
Ol «Dikii Armanmen» birge adam jinaýdy uiymdastyrǵan.
