Avanstyq tólemderdiń tómendeýi daǵdarys kezeńinde kompaniialar tabysynyń azaiýymen bailanysty boldy. Bul týraly Parlament palatalarynyń birlesken otyrysynda Qarjy ministri Erulan Jamaýbaev málim etti, dep habarlaidy QazAqparat.
«Bolashaq tólemder esebinen artyq tóleý máselesi boiynsha eskertýge qatysty toqtalsaq, biýdjetpen esep aiyrysýdyń ádistemelik erekshelikterine bailanysty derbes shottardaǵy artyq tólemdi tolyǵymen alyp tastaý múmkin emes.
Máselen, korporativtik tabys salyǵy boiynsha artyq tólem jyl ishinde zańnamada kózdelgen ai saiynǵy avanstyq tólemderdi tóleýge negizdelgen. Birkelki túsimderdi qamtamasyz etýdiń mundai praktikasy halyqaralyq tájiribege sáikes keledi. Onyń ishinde Ekonomikalyq yntymaqtastyq jáne damý uiymy elderi de bar», - dedi E. Jamaýbaev Úkimet pen Esep komitetiniń 2020 jylǵa arnalǵan respýblikalyq biýdjettiń atqarylýy týraly esepterin qaraý kezinde.
Onyń aitýynsha, bul rette, avanstyq tólemderdi ai saiyn tóleý boiynsha mindetteme kirisi 325 myń ailyq eseptik kórsetkishten asatyn korporativtik tabys salyǵynyń iri tóleýshilerine ǵana qatysty. Qalǵan 90% tóleýshilerge mundai norma qoldanylmaidy. Jalpy alǵanda, esepti kezeńde avanstyq tólemderdiń tómendeýi daǵdarys kezeńinde kompaniialar tabysynyń azaiýymen bailanysty boldy.
«Qosylǵan qun salyǵyna kelsek, 2021 jylǵy 1 qańtardaǵy jaǵdai boiynsha qosylǵan qun salyǵy boiynsha artyq tólem 1,6 trln teńgeni qurady. Osy somanyń basym bóligi salyq tóleýshiler satyp alǵan taýarlar men kórsetilgen qyzmetter boiynsha qalyptasqan. Iaǵni biýdjetke is júzinde artyq salyq tólengen joq. Degenmen bul qarajat qosylǵan qun salyǵyn tóleý boiynsha týyndaǵan salyq mindettemeleriniń esebine paidalanylýy múmkin», - dedi ministr.
