Tanymal qazaqstandyq ánshiler Dequine jáne Dose "Pervyi kanal" telearnasyndaǵy "Vechernii Ýrgant" baǵdarlamasynyń qonaǵy boldy, - dep habarlaidy "Ult aqparat".
Dequine (shyn aty - Danelia Sadyqova) jáne Dose (shyn aty - Aidos Jumalinov) bul shoýda "Veter" ánin oryndady.
Ivan Ýrgant Dose jaqynda "Poka" albomyn shyǵarǵanyn aitty. Qazaqstandyq ártis Siýzanna jáne Dequine siiaqty talantty mýzykanttarmen án jazǵan.
Sonymen qatar, Ýrgant keshte Dequine-niń Máskeýde óner kórsetetinin eske saldy.
"Men qazaqtarǵa, olardyń mýzyka salasynda talantty ekenine tańǵalamyn", "Qazaqtar sánge ainaldy", "Qazaqtardyń tanymaldyǵy sonsha endi VÝ-da kórsetilip jatyr","Olar ándi qalai taza aitty, ádemi án, daýystary keremet, endi jii tyńdaimyn", - dep qoldanýshylar videoǵa pikir qaldyrǵan.
Al, Dequine óziniń Instagram paraqshasynda: "Qymbattylarym, men únsiz otyra almaimyn, biz muny iske asyrdyq!" – dep jazdy.
Budan buryn reseilik tanymal ánshi Alla Pýgacheva "Mýzykaliti" shoýynyń efirinde qazaqstandyq ánshi Dequine-niń vokaldyq múmkindikterine súisingen bolatyn. Basta kompozitsiianyń jartysyn tyńdaǵannan-aq maqtaý sóz aitsa, Resei estradasynyń primadonnasy Daneliany amerikalyq pop-juldyz Rihanna-men salystyrdy.
"Óte jaqsy oryndady. Aranjirovkasy da tamasha. Mýzykanttardyń myqty ekeni kórinip tur. Ol batystyq bir ánshini esime túsirip tur. Maqamy da jaqsy. On upai", - dedi Alla Pýgacheva.
Birneshe kún buryn ol Skriptonit shyǵarmashylyǵyn joǵary baǵalap, ony "óziniń súiikti aqyny" dep atady.
Qazaqstandyq ánshi Dequine mansabyn 2016 jyly bastaǵan. 2019 jyldyń jazynda ol "Femida" kompozitsiiasyn shyǵaryp, ol oǵan úlken tanymaldyq ákelgen. Án Apple Music Kazakhstan top-100-ge kirdi. Keiin ándi estigen Warner Music Russia ókilderi oryndaýshyǵa habarlasyp, 2020 jyldyń basynda olarmen albom shyǵarý týraly kelisimshartqa qol qoidy.
Dose - qazaqstandyq ánshi, 1993 jyly Pavlodarda týǵan. Apple Music-ke bergen suhbatynda "Poka" ánshi men prodiýserdiń alǵashqy albomy ekeni aitylǵan. Biraq onyń mýzykasy burynnan belgili.
Qazaqstandyq ánshi Skriptonit qurǵan "Jillzay" mýzykalyq leiblynyń ártisi boldy. Ol Strong Symphony laqapatymen bitmeiker retinde T-Fest-pen "Ýleti", Pharaoh "Amneziia", Gruppa Skryptonite "Podrýgi" jáne Skriptonittiń oryndaýyndaǵy "Okean" tanymal ánderin jazýǵa qatysqan.
Eske salsaq, jaqynda ǵana dál osy reseilik shoýǵa otandasymyz Imanbek qatysyp, óziniń Grammy mýzykalyq syilyǵyn jeńip alǵany týraly áńgimelep berdi.
