Kollaj: ulysmedia.kz
Parlament palatalarynyń birlesken otyrysynda Májilis tóraǵasy Erlan Qoshanov ekinshi sessiiany qorytyndylai kele úkimetti synǵa aldy, dep habarlaidy Ulysmedia.kz.
«Parlament pen Úkimettiń birlesip tiimdi jumys istegenin aita otyryp, zań shyǵarý protsesine teris áser etetin jekelegen kemshilikterdi de atap ótken jón. Júieli kemshilikterdiń biri – durys josparlamaý, zań jobalarynyń jetkilikti pysyqtalmaýy jáne daiyn bolmaýy. Úkimettiń kóbinese merzim jaqyndaǵan kezde belsendiligi arta bastaidy. Muny, ádette, jyldyń nemese sessiianyń sońynda baiqaýǵa bolady. Parlament qabyrǵasynda zań jobalarynyń kóptegen normalaryn qaita óńdep shyǵý, jekelegen normalar boiynsha Úkimet músheleriniń naqty ustanymynyń bolmaý úrdisi qalyptasty», - dedi Qoshanov búgingi otyrysta.
Onyń aitýynsha, mysaly, densaýlyq týraly kodekstiń bir normasy tek birinshi jartyjyldyq ishinde qarama-qarsy pozitsiiada eki ret túbegeili ózgergen. Qańtar aiynda elimizde tirkelgen dárilik zattar men meditsinalyq buiymdardy shekti baǵasyz satyp alýǵa jáne birlesip tóleýge jol berilmeidi degen norma qabyldanǵan. Alaida maýsym aiynda bul norma qaita alyp tastalǵan. Eki jaǵdaida da ózgeristiń qajettiligi halyqtyń dári-dármeksiz qalýy múmkin degen ýájben túsindirilgen.
«Mundai faktiler birli-jarym emes. Qaralyp jatqan zań jobalaryna ózgerister tolassyz engiziledi, olardyń ishinde jobanyń tujyrymdamasyna sai kelmeitin túzetýler de bar. Sonyń saldarynan zań jobasynyń bastapqy kontseptsiiasy aitarlyqtai ózgeredi. Ministrler depýtattar arqyly ózderiniń «janyp turǵan» máselelerin sheship qalǵysy keletin jaǵdailar da bar. Bul Májiliste de, Senatta da qaralý satysynda kezdesedi. Osynyń saldarynan Májilis maquldaǵan zań jobasyn Senat túzetýlermen qaitarýǵa májbúr bolady. Kóp jaǵdaida bul jańa túzetýler – Májiliste usynylmaǵan jáne talqylanbaǵan normalar bolyp keledi», - dedi ol.
Erlan Qoshanov zań jobalaryn sapasyz daiyndaý jáne saraptamalardy ýaqtyly júrgizbeý Memleket basshysy alǵa qoiǵan mindetterdi iske asyrýǵa kedergi keltirýi múmkin ekenin de eskertti. Depýtattardyń túzetýlerine qorytyndylardyń ýaqtyly berilmeýi de erekshe nazar aýdarýdy qajet etedi deidi ol.
«Mysaly, bala quqyqtaryn qorǵaý jónindegi zań jobasy boiynsha Úkimettiń jaýaby 5 aidan keiin keldi. Sonyń saldarynan, bul zań májiliske engizilgennen keiin eki jyl ótken soń ǵana qabyldandy. Zań jobalaryn parlamenttiń qos palatasynda tanystyrý kezinde jekelegen ministrlikter men vedomstvolar baiandamashylarynyń daiyndyǵy jetkiliksiz bolatyn jaǵdailar da kezdesedi. Zań jobalary men saraptamalardyń sapasyn baǵalaý aldaǵy ýaqytta da Parlamenttiń erekshe baqylaýynda bolady. Depýtattyq korpýstyń ózderiniń saýaldaryna beriletin jaýaptardyń sapasyna da kóńili tolmai jatady. Saýaldarda biz, eń aldymen, sailaýshylarymyzdyń tilekteri men amanattaryn kóteretinimizdi túsiný kerek. Oǵan Úkimet pen basqa da memlekettik organdardan standartty, syrǵytpa jaýaptar keledi», - dep atap ótti Erlan Qoshanov.
«Sondyqtan, memlekettik organdardyń depýtattyq saýaldarǵa aýyzsha jaýap berýin praktikaǵa engizdik» deidi tómengi palata basshysy. Sonymen qatar ol aldaǵy ýaqytta depýtattar korpýsy men úkimet músheleri zań sapasyn arttyrýda júieli jumysty jolǵa qoiýǵa birlesip atsalysýy kerek ekenin málim etti.
