Sessiia barysynda Parlament 27 halyqaralyq shart pen memleketaralyq kelisimdi ratifikatsiialady. Bul týraly búgin Parlament palatalarynyń birlesken otyrysynda Májilis tóraǵasy Erlan Qoshanov aitty, dep habarlaidy QazAqparat.
«Sessiia barysynda depýtattardyń bastamasymen 27 zań jobasy ázirlendi. Olardyń 19-y qazirgi ýaqytta qabyldandy jáne 8 zań jobasymen jumys jalǵasyp jatyr. Depýtattar bastamashy bolǵan zańdardyń birqatary Memleket basshysynyń tapsyrmasyn oryndaýǵa baǵyttalǵan», - dedi Qoshanov jetinshi sailanǵan Parlamenttiń ekinshi sessiiasynyń jumysyn qorytyndylaý kezinde.
Osy oraida ol múgedektigi bar adamdardyń ómir súrý sapasyn jaqsartý máseleleri jóninde de zań qabyldanǵanyn eske saldy. Sonyń nátijesinde 13 myńǵa jýyq ata-ana balalarynyń ońaltýdan ótýi kezinde birge turý men tamaqtanýǵa jumsalatyn shyǵystardyń 70 paiyzyna ótemaqy alady.
«Qorytyndylanyp otyrǵan sessiia barysynda Parlament eldiń syrtqy saiasattaǵy basym mindetterin iske asyrýdy bekitetin, shet eldermen jáne halyqaralyq uiymdarmen yntymaqtastyqty nyǵaitýǵa baǵyttalǵan 27 halyqaralyq shart pen memleketaralyq kelisimdi ratifikatsiialady. Olardyń ishinen mediatsiia nátijesinde qol jetkizilgen halyqaralyq tatýlasý kelisimderi týraly konventsiiany, tolyq emes jumys ýaqyty jaǵdailaryndaǵy jumys týraly konventsiiany, Kaspii teńiziniń teńiz ortasyn qorǵaý jónindegi negizdemelik konventsiiaǵa hattamalardy erekshe atap ótkim keledi», - dedi Májilis tóraǵasy.
Onyń aitýynsha, ótken sessiiada depýtattyq saýaldarmen de kóptegen másele kóterildi. Parlament depýtattary Úkimet pen basqa da memlekettik organdardyń atyna 494 depýtattyq saýal joldady.
«Depýtattar 49 ret ótkizilgen «dóńgelek ústelde» kóptegen máselelerdi qarap-zerttedi. Olardyń arasynda aýyldyq eldi mekenderdi taza aýyz sýmen qamtamasyz etý, memleket kepildik bergen zań kómegin kórsetý, Ombýdsmenniń quqyqtyq mártebesi, qylmystyq qýdalaý jáne jazany oryndaý salasynda adam quqyqtaryn saqtaý, kásipkerlikke memlekettiń qatysýyn azaitý jáne basqa da máseleler bar», - dedi ol.
«Ótken sessiiada depýtattyq korpýstyń qyzmeti Úkimetpen tyǵyz bailanysta júzege asyryldy. Birlesken jumystyń tiimdiligin arttyrý úshin sessiia barysynda birneshe ministrlik pen vedomstvo basshylary depýtattardyń aldynda baǵdarlamalyq qujattardyń iske asyrylýy týraly baiandama jasady. Máselen, sessiia barysynda 14 úkimet saǵaty ótkizildi. Atqarylǵan is-sharalardyń naqty nátijesi – parlamentariilerdiń ulttyq jobalardy júzege asyrý tiimdiligin arttyrýǵa jáne halyqtyń ótkir problemalaryn sheshý tetikterin ázirleýge baǵyttalǵan keshendi usynystarynan turady», - dedi Májilis tóraǵasy.
Budan buryn habarlanǵandai, Parlament depýtattary kanikýlǵa ketti. Qoshanov ekinshi sessiianyń zańnamalyq kún tártibi aitarlyqtai mazmundy bolǵanyn aitty.
«Máselen, Pralament palatalarynyń 4-shi birlesken otyrysy ótti. Májilistiń 42 jalpy otyrysy ótip, onda 271 másele qaraldy. Senattyń 42 jalpy otyrysy ótip, onda 148 másele qaraldy. Osy sessiia kezinde qos palatanyń jumysynda 127 zań jobasy boldy, onyń 78-i qabyldandy», - dedi Májilis tóraǵasy.
