Májilistegi "Nur Otan" fraktsiiasynyń depýtattary zeinetaqy jinaǵyn merziminen buryn paidalaný boiynsha jetkilikti shekti qaita esepteýdi talap etti, dep habarlaidy Sputnik Qazaqstan.
3 jeltoqsanda BJZQ óz saitynda 2022 jylǵa arnalǵan zeinetaqy jinaǵynyń shekti mejesin jariialady. Depýtat Amanjan Jamalovtyń aqparatynsha, jańa shekti mólsher boiynsha zeinetaqy jinaǵyn merziminen buryn paidalana alatyn qazaqstandyqtar sany 600 myńnan 150 myńǵa deiin, iaǵni tórt ese qysqarady.
Májilismen jetkilikti shekti esepteý ádistemesi "Zeinetaqymen qamsyzdandyrý" týraly zańǵa sáikes kelmeitinin málimdedi.
"Zańnyń 1-baby 15-1-tarmaǵyna sáikes, jetkilikti shek – eń tómengi zeinetaqydan tómen emes, ai saiynǵy zeinetaqymen qamsyzdandyrýǵa qajetti zeinetaqy jinaǵynyń eń tómen mólsheri. Alaida ádistemede kórsetkish retinde eń tómen jalaqy (60 000 teńge) qoldanylady. Osylaisha ádistemede shekti meje eń tómengi zeinetaqyǵa (46 302 teńge) emes, eń tómen jalaqyǵa negizdelgen. Bul biliksizdikten nemese sanaly túrde jiberilgen qatelik. Osynyń saldarynan zeinetaqy jinaǵynyń jetkilikti shegi ortasha eseppen 64%-ten 83%-ke deiin kóterilip otyr", - dedi Jamalov.
Depýtattyń aitýynsha, eger shekti mejeni esepteý kezinde Zańmen belgilengendei eń tómengi zeinetaqy qoldanylsa, jetkilikti shektiń mólsheri 2021 jylmen salystyrǵanda nebári 9%-ke óser edi.
"Ekinshiden, BJZQ-da jetkilikti shekti esepteý kezinde múddeler qaqtyǵysy bar. BJZQ zeinetaqy aktivterin ustaýshy retinde halyqtyń óz jinaǵyn paidalanýyna múddeli emes. Sol sebepti eń tómengi jetkilikti shekti esepteý mindeti BJZQ quzyretine kirmeýi kerek. Munymen eńbek jáne halyqty áleýmettik qorǵaý ministrligi ainalysýǵa tiis. Óitkeni olar áleýmettik qamsyzdandyrý salasynda saiasatty júzege asyrýǵa jaýapty organ. Al BJZQ zeinetaqy shottaryn ashý, zeinetaqy jarnasyn aýdarý, jinaqtaýshy zeinetaqysyn tóleý siiaqty operatorlyq fýnktsiialardy júzege asyra alady. Bul saladaǵy saiasatty qandai da bir aktsionerlik qoǵam emes, tek úkimet pen ministrlik qana aiqyndai alady", - dedi Jamalov.
Osyǵan bailanysty depýtattar jetkilikti shekti esepteý kezinde eń tómen jalaqy kórsetkishinen bas tartýdy; 2022 jylǵa arnalǵan shekti mejeni eń tómen zeinetaqy mólsherimen qaita esepteýdi; jetkilikti shekti esepteý boiynsha ókilettikti eńbek jáne halyqty áleýmettik qorǵaý ministrligine berýdi usyndy.
Buǵan qosa, qyzmettik tekseris júrgizip, jetkilikti shekti belgileý ádistemesin ázirlegen jaýaptylardy jazalaýdy talap etti.
