Parlamenttiń birlesken otyrysy ótip, jetinshi sailanǵan Parlamenttiń ekinshi sessiiasy resmi túrde jabyldy. Depýtattar kanikýlǵa ketti, dep habarlaidy Sputnik Qazaqstan.
30 maýsymda Parlament ekinshi sessiianyń jumysyn qorytyndylady. Májilis spikeri Erlan Qoshanov Parlamenttiń osy sessiiasy barsha qazaqstandyq qoǵam úshin airyqsha jaýapty kezeńde ótkenin atap ótti.
"Eń aldymen, biz eki jylǵa sozylǵan koronavirýs pandemiiasyn eńserip qana qoimai, ortaq kúsh-jigerimizdiń arqasynda aitarlyqtai nátijelerge qol jetkizdik. Qańtarda elimiz úlken qaterden aman-esen shyqty. Mundai oqiǵa memleketimizdiń jańa tarihynda buryn-sońdy bolmaǵan. Soǵan sai, der kezinde jáne jedel áreket etý qajet boldy", - dedi Qoshanov.
Spiker ekinshi sessiianyń zańnamalyq kún tártibi de aitarlyqtai mazmundy bolǵanyn aitty. Máselen, Parlament palatalarynyń 4 birlesken otyrysy ótkizildi. Májilistiń 42 jalpy otyrysy ótip, onda 271 másele qaraldy. Senattyń 42 jalpy otyrysy ótip, onda 148 másele qaraldy.
Bul jolǵy sessiia kezinde qos palatanyń jumysynda 127 zań jobasy boldy, onyń 78-i qabyldandy. Qazirgi ýaqytta Prezident Parlament qabyldaǵan zańdardyń 66-na qol qoiyp, zań kúshine endi.
"Sessiia barysynda zań shyǵarýshylar áleýmettik salany únemi basty nazarda ustady. Máselen, azamattardyń jekelegen sanattaryn áleýmettik qorǵaý máseleleri jónindegi zańdy qabyldadyq. Nátijesinde bazalyq áleýmettik kepildikterdiń ózekti máseleleri sheshildi. Sonyń ishinde erekshe kútimdi qajet etetin adamdardy qoldaý, ataýly áleýmettik kómek jáne zeinetaqymen qamsyzdandyrý qosa qarastyrylǵan", - dedi Májilis tóraǵasy.
Depýtattardyń bastamasymen 27 zań jobasy ázirlendi. Olardyń 19-y qabyldandy, al 8 zań jobasy boiynsha jumys jalǵasyp jatyr. Depýtattar bastamashy bolǵan birqatar zań prezidenttiń tapsyrmalaryn oryndaýǵa baǵyttalǵan.
"Biz jetinshi sailanǵan parlamenttiń ekinshi sessiiasyn aiaqtap otyrmyz. Elimizde bolyp jatqan ózgeristerge árqaisymyz óz mindetimizdei qarap, bir kisidei jumyla kirissek qana, shyn mánindegi Jańa Qazaqstandy qura alamyz. Aldaǵy jumysymyzda biz Memleket basshysy Qasym-Jomart Kemeluly Toqaevtyń jańa bastamalary men reformalaryn iske asyrýǵa jumylýymyz kerek. Kez kelgen synaqty birlesip eńsersek, Qazaqstannyń áleýeti budan da arta túspek", - dedi Qoshanov.
Májilis spikeri áriptesterine, Úkimet múshelerine, qoǵam belsendileri men sarapshylarǵa, buqaralyq aqparat quraldarynyń ókilderine alǵys aitty.
