QR Parlamenti Senatynyń tóraǵasy Máýlen Áshimbaev áleýmettik kásipkerlermen kezdesý ótkizdi, dep habarlaidy "Ult aqparat" joǵary palatanyń baspasóz qyzmetine silteme jasap.
Senat tóraǵasy áleýmettik kásipkerlik shaǵyn jáne orta biznesti damytý, halyqty jumyspen qamtý, áleýmettik problemalardy sheshý, sonymen qatar múmkindigi shekteýli azamattardy qoldaý úshin mańyzdy sala ekendigin eske saldy. Aldaǵy ýaqytta da memleket bul salaǵa shynaiy qoldaý kórsetýdi josparlap otyrǵandyǵyna nazar aýdartty.
«Memleket basshysy bul máselege airyqsha nazar aýdarady. QR Prezidenti naqty tapsyrma da bergen. Sondyqtan aldaǵy kezeńde memlekettik organdar tarapynan áleýmettik kásipkerlikke júieli qoldaý kórsetilýi tiis. Erekshe qajettiligi bar adamdar men áleýmettik álsiz toptar kásipkerlikpen ainalysyp, jumysqa ornalasý máselelerin sheshý úshin olardyń múmkindikterin keńeitýge airyqsha nazar aýdarǵan jón. Tolyqtai alǵanda, bul baǵyttaǵy negizgi qadamdardyń biri - áleýmettik kásipkerlik qyzmetin retteitin jáne memleket tarapynan qoldaýdyń tiimdi tetikterin aiqyndaityn zań qabyldaý», - dedi Máýlen Áshimbaev.
Senat tóraǵasy qazirgi ýaqytta áleýmettik kásipkerlik kóptegen elde keńinen taralǵanyn atap ótti. AQSh, Ulybritaniia, Kanada jáne Germaniiadaǵy áleýmettik kásiporyndar eldiń jalpy ishki ónimin 3-ten 5 paiyzǵa deiin qalyptastyrady.
«Biz birlesip zań jobasyn ázirleýimiz qajet. Búgingi otyrysty úlken jumystyń basy retinde qabyldaimyz. Áleýmettik kásipkerliktiń negizgi maqsattarynyń biri - erekshe qajettiligi bar adamdardy ortaǵa beiimdeý jáne olardyń áleýmettik, ekonomikalyq belsendiligin arttyrý. Búginde elimizde áleýmettik jobalardy sátti júzege asyratyn kásipkerler bar jáne zań jobasyn ázirleý barysynda olardyń pikirleri men usynystary mindetti túrde eskerilýi tiis», - dedi Senat spikeri.
Onyń atap ótýinshe, Qazaqstanda áleýmettik kásiporyndar qarym-qatynasyn retteý salasyndaǵy zańnamalyq baza, sonymen qatar memlekettik qurylymdar men áleýmettik biznes arasyndaǵy ózara is-qimyldyń qajetti deńgeii joq.
Máýlen Áshimbaev Senat janynan áleýmettik kásipkerlikti qoldaý jáne damytý jónindegi zań jobasyn ázirleýmen ainalysatyn jumys tobynyń qurylatyndyǵyn málimdedi. Jumys Májilispen birge júrgiziletin bolady.
Kezdesý barysynda áleýmettik kásipkerlik salasynyń ókilderi birqatar naqty usynystar engizip, salany odan ary damytýǵa qatysty oilarymen bólisti.
Sharaǵa Ulttyq ekonomika ministri Rýslan Dálenov, Eńbek jáne halyqty áleýmettik qorǵaý ministri Birjan Nurymbetov, QR Parlamenti Májilisiniń depýtattary qatysty.
