Nur-Sultan qalasynyń arnaiy balalar úiindegi 35 jyl eńbek ótili bar meditsina qyzmetkeri 80 myń teńge jalaqy alady. Bul týraly Nur-Sultan qalasy máslihatynyń kezekti sessiiasynda aityldy, dep habarlaidy QazAqparat.
«Nur-Sultan qalalyq bilim basqarmasy 838 jetim balany óz baqylaýyna alǵany týraly aityp ótken bolatynmyn. Bul balalarǵa alańdamaýǵa bolady, sebebi ár bala ne kiip, ne jep, qalai ómir súrip jatqany baqylaýda. Al 18 jastan keiingi jetim balalardyń ómirimen eshkim ainalysyp jatqan joq. Sondyqtan 18-29 jas aralyǵyndaǵy jetimderdiń ómirine dál osylai baqylaý júrgizýdi Nur-Sultan qalasy Jastar sasaty basqarmasyna júkteý qajet. QR Konstitýtsiiasy, QR Prezidentiniń aktileri, QR Úkimet qaýlysy jáne basqa da kormativtik-quqyqtyq aktiler buǵan zańdy negiz bola alady», - deidi Nur-Sultan qalasy máslihatynyń depýtaty Lázzat Razbekova-Tileýhanova.
Onyń aitýynsha, jetim balalarǵa kómek kórsetýdi eń aldymen tárbieshilerden bastaý kerek.
«Jetim balalarǵa áke ornyna – áke, ana ornyna – ana bolyp otyrǵan tárbieshiler, ustazdar jáne meditsina qyzmetkerlerinen bastap kómek kórsetý qajet. Mysaly, Nur-Sultan qalasynyń arnaiy balalar úiindegi 35 jyl eńbek ótili bar meditsina qyzmetkeri 80 myń teńge jalaqy alady. Bul máselemen QR Densaýlyq saqtaý ministrligi jáne QR Bilim ministrligi ainalysyp jatyr, biraq problemanyń qashan sheshiletini belgisiz. Bizdiń usynys - jalaqyny kóterý máselesin qarastyrý qajet», - deidi ol.
