© Sputnik / Abzal Kaliev
Senator Marat Baqtiiaruly úshtildi oqytý júiesin toqtatýdy talap etti, dep habarlaidy Sputnik Qazaqstan.
"Sóz joq, jastarymyz aǵylshyn tilin bilýi kerek. Bul – ýaqyt talaby. Biraq aǵylshyn tilin bilý men ony tereń igerý elimizdegi 3,5 million oqýshynyń barlyǵyna birdei qajet pe? Balabaqshadaǵy, birinshi synyptaǵy oilaý júiesi áli tolyq jetilip qalyptaspaǵan, sanasy úlbirep turǵan qazaq sábilerine birden úsh tildi oqytýdyń ne qajeti bar? Bilim men ǵylymy joǵary Japoniia, Finliandiia, Frantsiia, Qytai 10 jasqa deiin balalalaryn ózge tilde nege oqytpaidy?", - dedi Baqtiiaruly Senattyń jalpy otyrysynda.
Osy oraida senator álemniń ozyq otyz eldegi bilim berý júiesin mysalǵa keltirdi. Onyń aitýynsha, eki til birinshi synypta tórt-aq elde, ekinshi synypta bes elde, al tórtinshi synypta on eki elde ǵana oqytylady.
"Al Qazaqstannan basqa álemniń birde-bir memleketinde úsh til múldem oqytylmaidy. Demek, shet tilin bilý saýatty bolýdyń basty kórsetkishi emes, ol álemniń bilim-ǵylymnyń biigin igerý úshin qajetti qural. Al shynaiy saýattylyq – ómirdi bilý, óziń tańdaǵan kásipti tereń igerý, qajetti daǵdylar men qabiletterdi qalyptastyrý. El prezidenti Qasym-Jomart Toqaev shet tildi oqytýdy ata-analardyń qalaýymen 5-shi synyptan bastaý oryndy ári tiimdi bolady dep aitqan. Biz de balabaqshalar men bastaýysh synyptardaǵy barlyq pán tek ana tilinde oqytylýyn qolǵa alýymyz kerek", - dep atap kórsetti Cenat depýtaty.
Senator táýelsizdik jyldary bilim salasy eń kóp reformaǵa ushyraǵanyn da erekshe atap ótti. Mysaly, sońǵy bes jyl ishinde bilim týraly zańǵa 29 ret ózgeris pen tolyqtyrý engizilse, memlekettik bilim berý standarty jeti ret ózgeriske ushyrady.
"Árbir ózgeris saiyn oqýlyqtyń mazmuny jańaryp, qyrýar qarjy jumsalyp, jańadan oqýlyqtar basylyp jatady. Damyǵan elderde, máselen, Japoniiadan memlekettik bilim berý standarty birneshe jyl talqylanyp, sońǵy ret 2010 jyly ózgertilip, osy kezge deiin ózgeris bolǵan joq", - deidi Baqtiiaruly.
Onyń oiynsha, elimizde jańartylǵan bilim berý baǵdarlamasyn jasaý jaǵynan asyǵystyqqa jol berildi. Al orta bilim sheksiz reformalardyń tájiribelik alańyna ainalyp ketti. Oǵan qosa, sońǵy úsh jyl ishinde 1,2 million sábi dúniege keldi. Aldaǵy ýaqytta olardyń barlyǵyn orta bilimmen qamtý máselesi týyndaidy. Ol úshin, kem degende, úsh myń mektep salý qajet.
Senator Baqtiiaruly osy máselege jaýapty Úkimet basshysynyń orynbasary Eraly Toǵjanovqa depýtattyq saýal joldap, máseleniń mán-jaiyn túsindirýdi talap etti.
