Foto: parlam.kz
Búgin Májiliste esirtki qylmysyna qarsy is-qimyl taqyrybyndaǵy Úkimet saǵatynda depýtat Snejana Imasheva nashaqorlyqqa qatysty jaýapkershilikti kúsheitýdi usyndy, dep habarlaidy Kazinform.
«Elimizde esirtkini tek qoǵamdyq oryndarda paidalanýǵa tyiym salynǵan. 2014 jylǵa deiin meditsinalyq emes maqsatta esirtkini qoldanǵany úshin ákimshilik jaýapkershilik bolǵan. Bul rette jyl saiyn 2,5 myńǵa jýyq adam jaýapqa tartyldy. Odan keiin jaýapkershilik Qylmystyq kodekske aýysty, biraq esirtkige tyiym salý tek qoǵamdyq oryndarǵa ǵana tarady. Nátijesinde, biyl meditsinalyq emes maqsatta esirtki egip alǵandarǵa qatysty 89 oqiǵa tirkelse, onyń 30-y ǵana sotqa joldanǵan. Degenmen, statistika boiynsha elde esirtkige táýeldilik azaiǵany baiqalmai otyr. Kerisinshe, «qoǵamdyq oryn» degen ýájge bailanysty esirtkige táýeldiler «men esirtkini úide ǵana paidalanyp júrmin, bul zańdy!» degen bir sózben jaýapkershilikten ońai qutylady. Sonymen qatar, biyl esirtkini meditsinalyq emes maqsatta alǵan 370 myńǵa jýyq fakti anyqtaldy», - dedi Imasheva.
Onyń aitýynsha, qazir Májiliste «esirtki jáne psihotropty zattardy meditsinalyq emes qoldanýdy» ákimshilik quziretke qaita berýdi usynatyn zań jobasy qaralyp otyr.
«Bul jerde depýtattardyń pikiri ekige jarylyp, keibiri ákimshilik jaýapkershilik engizýdi usynsa, ekinshi bóligi bárin sol kúiinde qaldyrý kerek ekenin aityp jatyr. Zańnama komiteti qoldanystaǵy qylmystyq jaýapkershilikpen qatar, ákimshilik jazany da engizýdi usyndy. Osy rette, qoǵamdyq oryndarda esirtkini meditsinalyq emes maqsatta qoldaný qylmystyq zańmen, al qalǵan jaǵdaida (úide, kólikte, klýbta) ákimshilik tártipte jazalanatyn bolady. Jalpy, osy qadamdar esirtkini meditsinalyq emes maqsatta paidalanýǵa tolyq tyiym salýdy qamtamasyz etedi», - dedi depýtat.
