Májilismender Ońtústik Koreiada Qazaqstannan barǵan zańsyz eńbek migranttarynyń kóbeiýine alańdaýshylyq bildirdi, dep habarlaidy "Ult aqparat".
Depýtat Asqar Beisenbaev bir top áriptesiniń atynan Koreiadaǵy qazaqstandyq eńbek migranttary týraly másele kóterdi.
«Aqparat betterinde jariialanǵan derekterge sáikes, qazaqstandyq jastardyń damyǵan elderdegi zańdy jáne zańsyz eńbek kóshi-qonyn retteý boiynsha sheshilmegen máseleler jii kórsetilip keledi. Sonyń birden-biri, bizdiń azamattarymyz úshin jasyryn eńbek etýge tartymdy elderdiń qatarynda Ońtústik Koreia bar. Bul elge qazaqstandyq azamattar zańsyz eńbek etý úshin, sońǵy 6 jyl boiy týristik vizany arqaý etip, jasyryn barady», - dedi depýtat.
Májilismenniń dereginshe, 2014 jyldan beri Ońtústik Koreia eline zańsyz eńbekke baratyn migranttardyń sany 359 adamnan 2019 jyly 12 myń adamǵa deiin kúrt ósken.
Onyń kóbi - 20 men 35 jas aralyǵyndaǵy belsendi eńbekke qabiletti jastar.
«Bul elde jasyryn eńbek etýshi azamattarymyzdyń quqyqtary múldem qorǵalmaǵan. Kei otandastarymyz aýrý men jaraqattan qaitys bolady. Óitkeni olardyń meditsinalyq jáne áleýmettik kómek alýǵa eshqandai múmkindigi joq», - deidi Asqar Beisenbaev.
Syrtqy ister ministrliginiń málimetinshe, 2020 jyly Koreiada 10 myńǵa jýyq otandasymyz zańsyz, iaǵni jasyryn eńbek etip keledi.
Depýtat koronovirýs pandemiiasyna qaramastan ondaǵy azamattarymyzdyń qaitýǵa yntasy joq degen málimet aitty.
Ol, sondai-aq, Ońtústik Koreiaǵa jasyryn keletin zańsyz migranttardyń negizgi legi Túrkistan óńiri men Shymkent qalasynan ekenin jetkizdi.
«Ulttyq banktiń resmi málimetinshe, 2015 jyldan bastap Ońtústik Koreiadan Qazaqstanǵa aqsha aýdarymdary 1,7 millionnan 105 mln AQSh dollaryna deiin ósti. Iaǵni 6 jyldyń ishinde Koreia elinen aýdarylǵan qarjy kólemi 60 ese ulǵaiǵan», - degen depýtat Koreiaǵa Qyrǵyzstan, Mońǵoliia jáne Ózbekstan elderinen azamattar kóp baratynyn, biraq ol elderdiń azamattary zańdy, ekijaqty kelisimsharttyń negizinde, «E-9 ýaqytsha» eńbek vizasyn alý arqyly jumys jasap júrgenin atap ótti.
«Ár qazaq – meniń jalǵyzym» dep Sabyr Adai aitqandai, Otanynan jyraqta eńbegin puldap, nan tabýdyń jolynda júrgen azamattarymyzdyń máselesin kim sheshpek?! Bile bilseńizder, 12 myń adam - on myńdaǵan taǵdyr men olardyń tileýin tilep júrgen 12 myń otbasy. Osyǵan bailanysty, Úkimet bul máseleni erekshe baqylaýǵa alyp, Ońtústik Koreia memleketindegi qazaqstandyqtardyń zańdy eńbek etý múmkindikterin tez arada pysyqtaýy qajet dep sanaimyz», - dedi Asqar Beisenbaev.
