Foto: Halyq Uni
Bilim berý, densaýlyq saqtaý mekemelerindegi orta jáne kishi býyn mamandary men qyzmetshilerdiń eńbekaqysyn keminde eki esege kóterý qajet. Bul týraly Májilistiń jalpy otyrysynda Úkimet basshysynyń orynbasary Tamara Dúisenovaǵa saýal joldaǵan depýtat Juldyz Súleimenova aitty, dep habarlaidy Kazinform agenttigi.
«Memleket basshysy Qasym-Jomart Kemeluly Toqaevtyń «Biz qarapaiym eńbek adamyna qurmet kórsetýimiz kerek» degen sózderinen eńbek adamynyń zańdy quqyqtaryn qorǵaý, áleýmettik qoldaý, ómir sapasyn jaqsartý arqyly áleýmettik ádilettilikti qalyptastyrý mindetteri aiqyndalady. Jyl saiyn Úkimet tarapynan azamattyq qyzmetshilerdiń jalaqysynda biliktilik sanattaryna qoldanylatyn koeffitsientterdi arttyrý qarastyrylyp, jalaqylary ósip keledi. Ókinishtisi sol, mekemelerdiń qyzmetin eden jýýshy, aýla tazalaýshy, santehnik, plotnik, elektrik sekildi qarapaiym eńbek adamdarynyń kúndelikti aýyr jumystarynsyz júzege asyrý múmkin emes bolsa da, búginde osy atalǵan jumysshylar azamattyq qyzmetshiler reestrinde joq. Sondyqtan, Úkimet tarapynan azamattyq qyzmetshiniń ailyǵyn arttyrǵanda osy eńbegi aýyr jumysshylardyń múddesi eskerilmei keledi», - dedi Májilis depýtaty.
Onyń dereginshe, densaýlyq saqtaý, oqý-aǵartý salasyndaǵy eń aýyr jumystardy atqaratyn jumysshylardyń ailyq jalaqysy tómen. Mysaly, mektepterdegi eden jýýshy – 82 856 teńge, elektrik - 81 575 teńge, aýla sypyrýshy 79 317 teńge jalaqy alady. Búgingi tańda tek orta bilim salasynda 261 myńnan astam osy sanattaǵy jumysshy bar. Olardyń 254 myńynyń qolyna tietin ailyq jalaqysy 74 myń teńgeden 85 myń teńge aralyǵynda ǵana.
«Bilim berý, densaýlyq saqtaý mekemelerindegi orta jáne kishi býyn mamandary men qyzmetshilerdiń eńbekaqysyn keminde eki esege kóterý qajet dep sanaimyz. Atqaratyn jumysynyń kúrdeliligine jáne aýyrlyǵyna ári ereksheligine qarai laiyqty jalaqy taǵaiyndalýy tiis dep esepteimiz. Sebebi, jalaqy áleýmettik jaǵdaidy, kúnkóris deńgeiin, densaýlyǵyna jáne balalaryn ósip-jetildirýge jetkilikti bolýy shart. Áleýmettik ádildik zamanynda jumysy aýyr, eńbegi adal jumysshylardyń jalaqysy artýy qajet. Halqymyzda «Eńbek adamy – eldiń quty» degen jaqsy sóz bar. «AMANAT» partiiasynyń fraktsiiasy qarapaiym eńbek adamdaryna sanatyndaǵy jumysshylarǵa laiyqty jalaqy tóleýdiń shyn máninde ádil ári biryńǵai júiesin qurý jóninde vedomstvoaralyq jumys tobynyń jasaqtalýy kezek kúttirmeitin másele dep bilemiz», - dedi Juldyz Súleimenova.
Osyǵan orai Májilis depýtaty «AMANAT» partiiasy fraktsiiasynyń atynan mynadai usynystar engizdi:
1. Oqý-aǵartý ministrligi 2016 jyldyń 29 qańtaryndaǵy Qazaqstan Respýblikasy Bilim jáne ǵylym ministriniń № 123 buiryǵymen bekitilgen Bilim jáne ǵylym salasyndaǵy azamattyq qyzmetshiler laýazymdarynyń tizilimin qaita qarap, eden jýýshy, plotnik, santehnik, aýla tazalaýshy, elektrik sanatyndaǵy jumysshylardyń osy tizilimge engizilýin qarastyrsyn.
2. Oqý-aǵartý ministrligi Ulttyq ekonomika ministrligimen birlese otyryp, respýblikalyq biýdjetti naqtylaý kezeńinde atalǵan jumysshylardyń bazalyq laýazymdyq jalaqysyn infliatsiiaǵa jáne jumystardyń kúrdeliligine sáikes ulǵaitýdy qarastyrsyn.
3. Oqý-aǵartý ministrligi Qarjy ministrligimen birlese otyryp, eden jýýshy, plotnik, santehnik, aýla tazalaýshy, elektrik sanatyndaǵy jumysshylardyń eńbek demalysyna tólenetin tólem mólsherine saýyqtyrý járdemaqysyn qosý múmkindigin qarastyryp, respýblikalyq biýdjetten shyǵyndaryn eseptesin.
