Parlament Májilisiniń jalpy otyrysynda «Aq jol» partiiasynyń depýtattary «Dáriger men meditsina qyzmetkeriniń mártebesi týraly» zań jobasyn ázirleýdi usyndy, dep habarlaidy "Ult aqparat".
Osy oraida depýtat Daniia Espaeva Úkimet basshysy Asqar Maminniń atyna joldanǵan saýaldy jariialady.
Onyń aitýynsha koronavirýs pandemiiasy densaýlyq saqtaý júiesindegi kóptegen problemalardy ashyp kórsetip, qoǵam men aq halatty jandarǵa osy máselelerdi shuǵyl túrde sheshýlerine týra keldi. Sonymen, aǵymdaǵy jyldyń 1 qazanyndaǵy jaǵdai boiynsha óz qyzmetinde basqa adamdardy qutqarý barysynda 182 dáriger men meditsina qyzmetkeri koronavirýstan qaitys boldy, 13 myń aq halatty jan osy indetpen aýyrdy.
«Pandemiia kezinde Prezident pen Úkimet dárigerlerdiń janqiiarlyǵyna qurmet kórsete otyryp, erekshe eńbek jaǵdailary úshin yntalandyrý syiaqylaryn, sondai-aq dárigerlerdiń ózderi juqtyrǵan jáne qaitys bolǵan jaǵdailar úshin tólemder engizdi. Alaida, 20 qazannan bastap bul tólemder toqtatyldy. Aita keteiik, «Aq jol» demokratiialyq partiiasy 28 qazandaǵy depýtattyq saýalynda Covid-19-ben aýyrǵan meditsina qyzmetkerlerine tólenetin tólemderdiń kúshin joiǵanyn synǵa alyp, olardy saqtaýdy talap etken bolatyn.
Densaýlyq saqtaý ministrligi óz sheshimin qoldai otyryp, sheneýnikter dárigerlerdiń jalaqylary joǵary ekenin aityp, baspasózde dárigerlerdiń milliondaǵan kirisi týraly málimdedi. Bul jerde másele tólem mólsherinde de emes, al memlekettiń pandemiianyń jańa tolqyny qarsańynda áleýmettik mańyzy zor mamandyqqa degen qarym-qatynasynda. Qarjylyq qiyndyqtar týyndaǵan jaǵdaida tólemderdi azaitýǵa bolady, biraq ony qoǵam men memlekettiń aq halattaǵy jandardyń eren eńbegin baǵalaý belgisi retinde qaldyrýǵa bolady», - dedi depýtat.
Osyǵan bailanysty «Aq jol» demokratiialyq partiiasynyń fraktsiiasy Úkimetke shuǵyl túrde «Dáriger men meditsina qyzmetkeriniń mártebesi týraly» zań jobasyn ázirlep, engizýdi usynady.
Sonymen qatar, ol jaqynda osyndai usynysty senator Murat Baqtiiaruly jáne basqa da áriptester jasaǵanyn atap ótti.
