Foto ©️ Tengrinews.kz / Álihan Sariev
Búgin Májilistiń jalpy otyrysynda Nartai Sársenǵaliev «Kenjehan» bazaryndaǵy saýdagerlerdiń máselesin kóterdi, dep habarlaidy Kazinform agenttigi.
«Búgingi depýtattyq saýalyma ádiletsizdiktiń shyrmaýyna shyrmalyp, shyrǵalańnan shyǵa almai qalǵan azamattardyń kóz jasy sebep. Olar - Almatynyń áigili «baraholka» bazarynda saýda jasaityn qandastar. Qaqaǵan qys pen mi qainatar jazda, tań atysy kesh batysy konteinerde otyryp, saýda jasaýǵa májbúr jandardy ózin qojaiyn sezingen ekiniń biri kelip tonap jatyr. Bizge joldaǵan hatynda «Kenjehan» bazarynyń saýdagerleri bar máselesin tizip jazǵan. Búginge deiin quzyrly oryndarǵa qansha aryzdansa da, kópshilik qanalǵan qarjysyn qaitara almai keledi», - dedi N. Sársenǵaliev Qarjy ministrligi men Bas prokýratýraǵa joldaǵan saýalynda.
Bul rette ol atalǵan bazarlardaǵy máseleni kóterdi.
«Baraholkadaǵy saýdagerlerden depýtattardyń atyna kelgen myna aryzǵa súiensek, sońǵy 10 jylǵa jýyq ýaqytta «Kenjehan» bazarynyń iesi Nazarbaeva Ánipa Ábishqyzy bolǵan delinedi. Onyń janyndaǵy adamdar bazardaǵy ár saýda ornyn 10 myń AQSh dollaryna satqan. Alaida satý-satyp alý jónindegi kelisimshartty jasamai, tek konteinerdiń pasportyn bergen. Kelisimshart talap etken jandardy «biz bazarǵa máńgi ielik etemiz, ýaiymdamańdar» dep qaitarǵan. Saýdagerlerdiń dereginshe, atalǵan bazarda 1000-ǵa jýyq konteiner bar, ári qarai esebin shyǵara berińizder. Qolda bar aryzdaǵy aqparatqa súiensek, 2022 jyldyń 4 sáýirinde «Kenjehan» bazarynyń 100 paiyz úlesi «Mitra «konsalting» JShS men Rozenberg E.M. degen azamatqa ótken. Bul bazar 640 million teńgege satyldy delinedi. Jańadan kelgen bazar qojaiyndary saýdagerlerge «konteinerlerińdi 325 myń teńgeden satyp alyńdar» dep talap qoiǵan. Sonda olar 1 orynǵa eki ret aqsha tólegen. Amalsyz aqshasyn bergen jandarǵa taǵy da satý-satyp alý týraly qujat berilmegen, tek «kelisim» qaǵazy tapsyrylǵan», - dedi depýtat.
Kelisimdi sol bazardaǵy notarýiste jasaýǵa mindettegen, ol úshin ár saýdager taǵy 43 myń teńgeden tólegen.
«Ár konteinerdiń iesinen aiyna 50 500 teńge aqy alynady degen taǵy bir tártip shyǵypty. Muny shaǵymdanǵan el aityp otyr. Bul soraqylyq emes pe? «Tólemese konteinerlerdi mórlep, jaýyp tastaidy» dep ashynady jurt. Saýdagerlerdiń 3 talaby bar. Birinshiden, bir konteinerge 2 ret aqsha tólegen jurt burynǵy nemese búgingi bazar iesindegi aqshany qaitaryp bersin deidi. Bir saýda ornyna eki ret aqsha tóleý aqylǵa syimaidy. Ekinshiden, ai saiyn qosymsha qarjy jinaý men jumys oryndaryn mórlep jaýyp tastaýǵa qatysty áreketterdiń zańdylyǵyn tekserip, shara qoldanylsyn deidi. Úshinshiden, «Kenjehan» bazaryn Almatydaǵy Memlekettik kirister departamenti teksergen, sonyń nátijelerin Qarjy ministrligi usynsyn. Osy depýtattyq saýaldy daiyndaý barysynda baraholkadaǵy «Rahat jáne «Evraziia» bazaryndaǵy saýdagerler de shaǵymdaryn jetkizdi. Sondyqtan eldegi barlyq bazardaǵy zańdylyqty tekserý kerek dep esepteimin», - dedi Nartai Sársenǵaliev.
