Densaýlyq saqtaýdy damytý respýblikalyq ortalyǵy resmi túrde Salidat Qaiyrbekova atyndaǵy Densaýlyq saqtaýdy damytý ulttyq ǵylymi ortalyǵy bolyp ózgerdi, dep habarlaidy "Ult aqparat".
QR Úkimetiniń qaýlysymen «Densaýlyq saqtaýdy damytý respýblikalyq ortalyǵy» ShJQ RMK «Salidat Qaiyrbekova atyndaǵy Densaýlyq saqtaýdy damytý ulttyq ǵylymi ortalyǵy» ShJQ RMK bolyp qaita ataldy.
DSDRO 1994 jyly Almatyda Densaýlyq saqtaýdyń meditsinalyq jáne ekonomikalyq problemalarynyń ǵylymi ortalyǵy bolyp quryldy.
Ortalyqtyń quqyqtyq mirasqory – Densaýlyq saqtaýdy damytý institýty Astanaǵa kóshirilip, 2011 jyly Respýblikalyq aqparattyq-taldaý ortalyǵymen birigý arqyly Respýblikalyq densaýlyq saqtaýdy damytý ortalyǵy ataýyn aldy.
Ortalyq qyzmetindegi mańyzdy baǵyttardyń bastaýynda Salidat Qaiyrbekova turdy.
«Táýelsiz Qazaqstannyń densaýlyq saqtaý júiesiniń damý tarihynda QR Densaýlyq saqtaý ministri Salidat Zekenqyzy Qaiyrbekovanyń róli erekshe. Salidat Zekenqyzy qatardaǵy dáriger-nevropatologtan bastap Qazaqstan Respýblikasynyń Densaýlyq saqtaý ministrine deiin, elimizdiń densaýlyq saqtaý júiesiniń barlyq deńgeilerinen ótti. Tereń kásibi bilimi, uiymdastyrýshylyq qabileti, kóshbasshylyq qasieti men jaýapkershilik, oilaý ótkirligi, qarapaiymdylyǵynyń arqasynda Salidat Zekenqyzy QR Densaýlyq saqtaý júiesin damytý jolynda kúrdeli mindetterdi sheship, tiimdi komanda qura aldy, sondai-aq meditsinalyq ortada joǵary bedelge ie bola bildi», - dep atap ótti QR Densaýlyq saqtaý ministri Aleksei Tsoi.
Qazaqstan Respýblikasynyń alǵashqy Densaýlyq saqtaý áiel-ministri, QR Memleket jáne qoǵam qairatkeri, densaýlyq saqtaý salasyndaǵy qairatker, meditsina ǵylymdarynyń doktory S. Qaiyrbekova óz ómirin halyqqa qyzmet etý jolyna arnady, otandyq densaýlyq saqtaý salasyna zor eńbek sińirdi.
«Densaýlyq saqtaý salasyndaǵy erekshe eńbegin baǵalap, S.Z. Qaiyrbekovanyń esimin máńgi saqtaý maqsatynda DSDRO ujymy Densaýlyq saqtaý ministrliginiń ardagerler keńesimen, sondai-aq meditsinalyq qoǵamdastyq ókilderimen birlese kele Ortalyqqa Salidat Qaiyrbekovanyń esimin berý týraly qoldaýhatpen shyqqan bolatyn. Salidat Zekenqyzy bergen durys baǵyttyń arqasynda Densaýlyq saqtaýdy damytý respýblikalyq ortalyǵy ǵylymi negizdelgen taldaý, ozyq innovatsiialyq tehnologiialardy ázirleý jáne engizý, densaýlyq saqtaý salasynyń jumys isteýi men halyq densaýlyǵynyń jai-kúiine taldaý júiesin qamtamasyz etý, salalyq aqparattyq júieni damytý jáne eldegi menedjment institýtyn kúsheitý boiynsha Qazaqstan Respýblikasyndaǵy jetekshi uiymǵa ainaldy. Bul transformatsiia bizdiń ortalyq úshin damýdyń jańa kezeńi bolmaq», - deidi Salidat Qaiyrbekova atyndaǵy Densaýlyq saqtaýdy damytý ulttyq ǵylymi ortalyǵynyń basqarma tóraǵasy Kamaljan Nadyrov.
Ortalyq óz jumysy barysynda memlekettik baǵdarlamalardy, jol kartalaryn, salalyq jobalardy jáne túrli normativtik-quqyqtyq aktilerdi ázirleýge jáne ádisnamalyq iske asyrýǵa qatysa otyryp, otandyq densaýlyq saqtaý júiesin damytýǵa úlken úles qosty.
Sondai-aq, meditsinalyq qyzmetterdiń sapasy jónindegi birikken komissiianyń jáne Formýliarlyq komissiianyń jumys organy retinde olardyń jumysyn saraptamalyq-taldamalyq súiemeldeýdi qamtamasyz etedi.
Ortalyq sonymen birge densaýlyq saqtaý salasyndaǵy kadr resýrstary jónindegi Ulttyq úilestirýshi mindetin atqarady.
Ortalyq DDU, AQSh Aýrýlardy baqylaý jáne aldyn alý ortalyqtary, Densaýlyq saqtaýdaǵy sapa jónindegi halyqaralyq qoǵam, BUU Balalar qory, Kanadanyń halyqaralyq densaýlyq saqtaý qoǵamy, Koreianyń densaýlyq saqtaý indýstriiasyn damytý institýty jáne basqa halyqaralyq seriktestermen yntymaqtasady.
Ortalyq aldyna jańa maqsat-mindetterdi qoiyp otyr.
Atap aitqanda, olar - alǵashqy meditsinalyq-sanitarlyq kómekti ádisnamalyq súiemeldeý ortalyǵyn, Ulttyq jobalardy iske asyrý jónindegi jobalyq keńseni, klinikalyq zertteýler jónindegi Úilestirý ortalyǵyn, tehnologiialyq quzyretterdiń salalyq ortalyǵyn qurý.
DSDRO-ny qaita ataý protsesine memlekettik biýdjetten qosymsha shyǵyn kózdelmegen.
