QR Densaýlyq saqtaý ministri Aleksei Tsoi Túrkistan oblysyndaǵy birqatar emdeý mekemelerin aralady, dep habarlaidy "Ult aqparat".
Oblys ákimdiginiń baspasóz qyzmetinen málim etkendei, Qazaqstannyń Bas dárigeri aldymen, Túrkistan qalasynda salynyp jatqan 630 oryndyq kópsalaly oblystyq aýrýhananyń qurylysymen tanysty. Jańa aýrýhanada ota jasaityn 16 bólme, 13 josparly jáne 3 jedel meditsinalyq kómek kórsetý bólimderi qarastyrylǵan. 1500-ge jýyq meditsina qyzmetkeri jumys isteitin bolady. Qurylys jumystaryn 2022 jyly aiaqtaý josparlanǵan.
Sondai-aq ministr oblystyq Qoǵamdyq densaýlyq basqarmasynyń basshysy Marat Pashimovpen Túrkistan qalasyndaǵy birqatar emdeý mekemelerin aralap, tynys-tirshiligimen tanysty. Qalalyq ortalyq emhanada bolyp, ondaǵy jumys barysyn baqylady. Emhana bir aýysymda 500 kelýshige laiyqtalǵan. 900-den astam meditsina qyzmetkeri jumys isteidi. Koronavirýs infektsiiasymen kúres maqsatynda 18 mobildi top qurylǵan. Emhananyń bazasynda sondai-aq, indetti anyqtaityn virýsologiialyq zerthana bar. Osy kúnge deiin 40 myńǵa jýyq azamattan synama alynǵan. Emdeý mekemesi barlyq qajetti meditsinalyq qural-jabdyqtpen de tolyq qamtamasyz etilgen.
Jergilikti meditsina qyzmetkerlerimen kezdesip, jaǵdailarymen tanysqan A.Tsoi óńirdegi emdeý mekemeleriniń qyzmetine oń baǵasyn berdi.
«QR Prezidenti halyqqa Joldaýynda alǵashqy meditsinalyq kómekti damytýǵa asa mán berdi. Túrkistan oblysynda bul baǵytta aýqymdy jumystar atqarylýda. Túrkistan qalalyq emhana qyzmetkerleriniń koronavirýs infektsiiasy beleń ala qalǵan jaǵdaida ekinshi tolqynǵa daiyndyǵy joǵary deńgeide ekendigin de baiqadyq. Emdeý mekemesi barlyq meditsinalyq qajettiliktermen jáne jedel-járdem kólikterimen qamtamasyz etilgen», - dedi Aleksei Tsoi.
Ministr óz sózinde, oblysta tumaýǵa qarsy ekpe egýge daiyndyq jumystary qarqyndy júrgizilip jatqandyǵyn atap ótti. Óńirge bul maqsatta vaktsinanyń birinshi partiiasy jetkizilgen. Osy aidyń 15-nen bastap egý jumystary bastalady.
Densaýlyq saqtaý ministri sapar sońynda Túrkistan qalasynda jańadan boi kóterip jatqan modýldi juqpaly aýrýlar aýrýhanasynda da boldy. Emdeý mekemesi 200 tósek-orynǵa eseptelgen. Nysannyń qurylysy josparlanǵan aimaqta barlyq qajetti injenerlik jeliler men kólik infraqurylymy bar.
