Búgin Densaýlyq saqtaý ministri Aleksei Tsoi Almaty oblysynyń Taldyqorǵan qalasyna baryp, Erkin aýylyndaǵy dárigerlik ambýlatoriianyń qurylysymen tanysty. Meditsinalyq nysan bir aýysymda 100 azamatqa meditsinalyq-sanitarlyq alǵashqy kómek kórsete alady, dep habarlaidy "Ult aqparat".
Vedomstvo baspasóz qyzmetinen málim etkendei, sondai-aq ministr modýldik juqpaly aýrýlar aýrýhanasynyń qurylys alańyna barǵan.
«Memleket basshysy Qasym-Jomart Toqaev Qazaqstan halqyna Joldaýynda jańa 13 juqpaly aýrýlar aýrýhanasyn salýdy tapsyrdy. Qazir óńirlerde ákimdikter 12 modýldik infektsiialyq aýrýhananyń qurylysyna jáne biyl qazan aiynda paidalanýǵa beriletin bir aýrýhanany qaita jańartýǵa kiristi. Bul jumys pandemiianyń yqtimal ekinshi tolqynyna daiyndyq aiasynda júzege asýda jáne halyqty ýaqtyly, sapaly kómekpen qamtamasyz etýge múmkindik beredi», - dedi A.Tsoi.
Densaýlyq saqtaý ministri COVID-ortalyǵynyń jumysymen de tanysty, munda mamandar aýyr jáne óte aýyr jaǵdaidaǵy naýqastarǵa keńes beredi, olardy emdeýdiń ádisterin qarastyrady. Ortalyq biyl shildede ashylǵan.
KVI ekinshi tolqynyna daiyndyq retinde Almaty oblysyndaǵy aýrýhanalarda ókpeni jasandy jeldetýge arnalǵan 303 apparat bar. 15 qyrkúiekke qarai olardyń sany 507-ge jetedi. Meditsinalyq uiymdarda 634 ottegi kontsentratory bar. Jergilikti biýdjet esebinen taǵy 100 dana jáne demeýshilik kómekpen 90 dana satyp alý jumystary júrgizilýde.
Meditsinalyq uiymdarǵa ottegi stantsiiasyn jáne 15 rentgen apparatyn ornatý úshin jergilikti biýdjetten qosymsha 763 mln teńge bólinedi. Meditsinalyq uiymdarda dári-dármek pen dezinfektsiialyq quraldardyń qory jetkilikti.
Óńirdegi infektsiialyq jáne provizorlyq statsionarlarda dene qyzýyn túsiretin – 215 150, virýsqa qarsy – 45 535 preparat, sondai-aq 255 157 antibiotik bar.
