Qazaqstanǵa Pfizer vaktsinasynyń tórt million dozasy jetkiziledi. Bul týraly densaýlyq saqtaý ministri Aleksei Tsoi málim etti, dep habarlaidy Sputnik Qazaqstan.
"Pfizer boiynsha biz negizgi kelisimshartqa qol qoidyq. Osy kompaniiamen kelisimshart rásimdeýdiń ózindik tártibi bar. Birneshe qujat bar. Biz sońǵy qujatty rásimdedik. Oǵan sáikes, shamamen, tórt million doza jetkiziledi", - dedi Tsoi ortalyq kommýnikatsiialar qyzmetinde ótken onlain brifingte.
Ministrdiń aitýynsha, Pfizer vaktsina kelgen boida ony aldymen 12 jastan asqan balalarǵa jáne júkti áielderge usynady. Sebebi ekpeni dál osy topqa jatatyn adamdarǵa salýǵa bolady.
"Menińshe, qazan-qarashada jetkizemiz. Qazir rastaýdy kútip otyrmyz. Jaqyn arada bolady", - dep atap kórsetti Tsoi.
Osy oraida ministr Pfizer vaktsinasyn saqtaý tártibine de toqtaldy. Búginde tońazytqysh quraldary jetkizilip jatyr. Ony barlyq ekpe pýnkterinde ornatady. Sebebi Pfizer-di -80 gradýsta saqtaý qajet.
