"Gedonist" meiramhanasynyń basshysy, sondai-aq, Denis Tenniń synyptasy Rýslan Hairýllaev mánerlep syrǵanaýshynyń anasy Oksana Tenniń sotta aitqan sózderine qatysty ne oilaitynyn jetkizdi, dep jazady Sputnik Qazaqstan.
Er adamnyń aitýynsha, mektep bitirgeli ol Denis Tenmen bailanysqa shyqpaǵan. Sportshynyń qazasynan biraz ýaqyt buryn ǵana qaita aralasa bastaǵan.
"Biz tek bir ret bailanysqa shyqtyq. Aramyzda eshýaqytta kikiljiń bolǵan emes. Kúdiktiler oryndyǵynda otyrǵan azamattarmen de tanys emespin. Bul bar bolǵany analyq sezimmen bailanysty bolyp jatqan jaǵdailar dep oilaimyn. Tergeý barysynda anyqtalǵan barlyq fakti — kezdeisoq dúnieler. Men Denis Tenniń kelýin qoimai suraǵan joqpyn, bar bolǵany shaqyrdym. Bir kún buryn qalai kórisetinimiz týraly jazdyq. Ol bizdiń meiramhanaǵa qatty kelgisi kelip júrdi. Bul - onyń sózderi", — dedi Hairýllaev.
Aitýynsha, ol Tendi túski asqa taǵamdardan aýyz tiip kórsin degen nietpen shaqyrǵan. Sondai-aq, er adam marqum sportshynyń gastronomiialyq jobalarǵa qyzyǵýshylyǵy bolǵanyn atap ótti.
"Denis Ten maǵan árdaiym jaqsy qarym-qatynas tanytty. Men ony aqjarqyn jáne shynaiy adam dep bilemin", — dedi mánerlep syrǵanaýshynyń synyptasy.
Sondai-aq, er adam 19 shilde kúni ne bolǵanyn eske aldy.
"Men ústel basynda otyrǵanmyn, janyma eden jýýshy aiqailap júgirip keldi. Meiramhanamyz ekiqabatty bolǵandyqtan, tómenge tústim. Aspazdarmen birnárse bolǵan shyǵar dep oiladym. Qazaq tilinde birnárseler aitylyp jatty: tapa-tal túste kimde pyshaq bolýy múmkin, bireýdi jaralap ketipti degendei. Men qyzmetshiler arasynda janjal bolǵan shyǵar dep oiladym. Oqys jaǵdaidyń syrtta bolǵanyn túsinip, sol jaqqa qarai júgirdim", — dedi Hairýllaev.
Onyń aitýynsha, ol osy jaǵdaidan bir kún buryn Denis Tendi Panfilov kóshesinde kezdeisoq jolyqtyrǵan. Iaǵni meiramhanasyna sol sátte shaqyrǵan.
Denis Tenniń anasy Oksana Ten búgin sot otyrysynda ulynyń ajal qushqan kúnin eske alyp, nege tapsyryspen óltirildi dep sanaitynyn túsindirgen bolatyn.
Denis Tenniń ólimine qatysty qylmystyq is boiynsha sot 25 jeltoqsanda bastaldy. Otyrysta jábirlenýshi taraptyń advokaty Nurlan Óstemirov Denis Ten tapsyryspen óltirildi dep málimdep, sottan isti qosymsha tergeýge jiberýdi suraǵan bolatyn. Biraq sýdia isti qaita tergeýge jiberýdiń qajeti joq dep sheshti.
Budan bólek, Tenniń otbasynyń qorǵaýshysy sportshynyń ólimine sebep bolǵan aina urlanǵan sátti eki politseidiń kórýi múmkin ekenin aitqan edi.
3 qańtarda ótken sot otyrysynda Qudaibergenov pen Qiiasov urlyq jasaǵandaryn moiyndady. Alaida Denis Tendi óltirýdi josparlaǵan joqpyz dedi. Al Tolybaeva sottan ózi aiyptalyp otyrǵan baptardy ózgertýdi surady.
