5 jáne 6 qyrkúiek kúnderi elordaǵa eki oblystyń fermerleri 800 tonnadan astam aýylsharýashylyq ónimin ákeledi, dep habarlaidy "Ult aqparat" qala ákimdigine silteme jasap.
5-6 qyrkúiek kúnderi «Han Shatyr» saýda oiyn-saýyq ortalyǵynyń janynda Túrkistan jáne Almaty oblystary ákimdiginiń uiymdastyrýymen aýyl sharýashylyǵy ónimderiniń jármeńkesi ótkiziledi.
5 jáne 6 qyrkúiekte Almaty oblysynan aýyl sharýashylyǵy ónimderi jármeńkesine úsh qala – Tekeli, Qapshaǵai jáne Taldyqorǵan qalalary jáne 17 aýdan qatysady.
Jalpy alǵanda, 370,4 tonna aýyl sharýashylyǵy ónimi nemese 48 ataýly ónim ákelinedi. Fermerler 44,5 tonna et, 16,1 tonna sút ónimin, 113,6 tonna kókónis, 14,7 tonna balyq, 38 tonna jemis-jidek, 42,6 tonna kartop, 100 tonna basqa da ónimder ákeledi. Jalpy somasy 170,5 mln teńgeniń ónimin satý josparlanyp otyr.
Jármeńkede Túrkistan oblysy sharýalary 447,2 tonna aýyl sharýashylyǵy ónimin 15-20 paiyzǵa tómen baǵamen usynady.
Atap aitqanda, 34 júk kóligine tielgen 267,7 tonna kókónis, baqsha, kartop, 29,5 tonna jemis-jidek, 72 tonna et jáne et ónimderi, 47,5 tonna sút ónimderi, 10 tonna balyq, 6 tonna bal, 14,5 tonna jemis shyryny men konservi ónimderi.
Túrkistan ákimdigi negizgi ónimder boiynsha baǵalarǵa da taldaý jasaǵan. Máselen, Nur-Sultan qalasynda siyr etiniń ortasha baǵasy 2000 – 2100 tg/kg bolsa, jármeńkede 1700-1800 teńgeden, qarbyz, qaýyn 130-200 tg/kg bolsa, jármeńkede 75-100 tg/kg, kókónistiń ortasha baǵasy 150-200 tg/kg bolsa, jármeńkede 100-150 teńgeden satylady.
Jármeńkege kelýshiler qatań sanitarlyq-gigienalyq talaptardy saqtaý qajet. Maska taǵý, qashyqtyqty saqtaý jáne mindetti túrde antiseptiki qoldanýy tiis.
