Jalpyǵa birdei deklaratsiialaýdy engizý boiynsha jumysty bekitilgen merzimge sáikes jalǵastyrý kerek. Bul týraly Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Jalpyǵa birdei deklaratsiialaýdy engizý jeke tulǵalar tabysynyń ashyqtyǵyn qamtamasyz etedi. Biylǵy jylǵy 1 qańtardan bastap memlekettik qyzmetshiler jáne olarǵa teńestirilgen adamdar úshin jalpyǵa birdei deklaratsiialaýdy engizýdiń birinshi kezeńi bastaldy. 2023 jyldan bastap memlekettik mekemeler men kvazimemlekettik sektordyń qyzmetkerleri deklaratsiia tapsyra bastaidy. Keiin, 2024 jyldan bastap zańdy tulǵalardyń basshylary men quryltaishylary tapsyrady. Al 2025 jyldan bastap azamattardyń barlyq qalǵan sanattary tapsyra bastaidy», - dedi Úkimet basshysy.
Bul rette Asqar Mamin deklaratsiia qabyldaityn elektrondyq servister, atap aitqanda salyq tóleýshiniń kabineti, «Elektrondyq úkimettiń» veb-portaly jáne «E-Salyq Azamat» arnaiy mobildik qosymshasy qazirden bastap jumys istei bastaǵanyn aitty.
«Osy rette, jalpyǵa birdei deklaratsiialaýdy engizý boiynsha jumysty bekitilgen merzimge sáikes jalǵastyrý kerek. Sonymen birge, deklaratsiiany toltyrý jáne tapsyrý qaǵidalary boiynsha halyq arasynda keń aýqymdy túsindirý jáne oqytý jumystaryn júrgizý qajet», - dedi Asqar Mamin.
