DDU Bas direktory Tedros Gebreiesýs ótken qatelikterdi qaitalamaýǵa jáne COVID -19-ǵa qarsy vaktsinany jasaý men óndirýde oqshaýlaný tásilin qoldanbaýǵa shaqyrdy. Osy rette ol eki kezeńnen turatyn vaktsinamen qamtamasyz etýdiń jahandyq josparyn usyndy. Bul týraly BUU Jańalyqtar ortalyǵy habarlady.
DDU basshysy Jenevada ótken baspasóz máslihatynda qańtar aiynyń sońynda qurylǵan seriktestik platformasy elderge qarjylyq problemalardy, sondai-aq tájiribeli meditsina kadrlaryna tapshylyqty jáne qajetti zattardyń bolmaýyna bailanysty qiyndyqtardy jeńýge kómektesip jatqanyn eske saldy.
«Bul rette, memleketter basshylary eń aldymen, óz azamattaryn qorǵaǵysy keledi. Alaida, pandemiiaǵa qarsy is-qimyl sharalary ujymdyq sipatta bolýy tiis. Bul qaiyrymdylyq týraly másele emes. Sabaq bolarlyq tájiribeden túsingenimizdei, pandemiiany toqtatýdyń jáne ekonomikalyq damýdy qalpyna keltirýdiń eń qysqa joly – bul jekelegen elderdiń barlyq turǵynyn emes, táýekeli joǵary toptardy múmkindiginshe jedel qorǵaý», – dep atap ótti DDU bas direktory.
Onyń aitýynsha, bul tásil barlyq memlekettiń múddesine jaýap beredi. Sebebi bir ǵana adam qorǵaýdan tys qalsa, eshkim ózin qaýipsiz sezine almaidy.
Tedros Gebreiesýstiń sózinshe, birlesip jumys istei otyryp, biz «alǵy sheptegilerdiń» barlyǵyn qorǵanys quraldarymen, al emdeýdi qajet etetinderdi deksametazon siiaqty tiimdi preparattarmen qamtamasyz ete alamyz.
Sondai-aq DSU basshysy diagnostikanyń jańa quraldaryn, dári-dármekter men vaktsinalardy ázirleý júrip jatqan qazirgi kezde ótken qatelikterdi qaitalamai, «vaktsinalyq ultshyldyqtan» aýlaq bolýǵa shaqyrdy.
DSU basshysy málim etkendei, ádilettilik jáne teńquqylyq qaǵidattaryn negizge ala otyryp vaktsinalardy úlestirý jospary eki kezeńnen turady. Birinshi kezeńde, virýstyń taralýynyń jalpy táýekelin tómendetý úshin vaktsina ony ázirleý boiynsha jahandyq mehanizmge qatysyp jatqan barlyq memleketke teń kólemde jáne bir mezgilde jetkiziledi.
Ekinshi kezeńde qaýip-qater men osaldyq aýqymy nazarǵa alynatyn bolady. Bul jerde másele, eń aldymen, meditsina qyzmetkerleri men áleýmettik qyzmetshiler, sondai-aq qart jáne sozylmaly aýrýlary bar adamdar týraly bolyp otyr.
«Eger biz táýekel tobyndaǵy adamdardy bir mezgilde qorǵai almasaq, densaýlyq saqtaý júielerin jyldam turaqtandyra almaimyz jáne jahandyq ekonomikany qalpyna keltirý múmkin bolmaidy», - dedi ol.
