Dúniejúzilik densaýlyq saqtaý uiymy (DDSU) koronavirýstyń jańa túri – "omikron" anyqtalǵan 40 shaqty elde atalǵan shtammen bailanysty adam ólimi tirkelmegenin habarlady.
Degenmen uiym 3 jeltoqsan kúngi málimdemesinde jańa varianttyń qanshalyqty jyldam juǵatyny, onyń áseri men vaktsinalarǵa yqpaly áli tolyq anyqtalmaǵanyn eskertti.
Ázirge tolyq emes aqparatqa qaraǵanda, Ońtústik Afrikadan taraǵan koronavirýstyń jyldam juǵatyn varianty buǵan deiin taraǵan shtamdarǵa qaraǵanda naýqastarǵa jeńil áser etýi múmkin. Degenmen omikron juqqan adamdardyń keibiriniń aýrýhanaǵa túskeni jóninde de aqparat bar.
Álemniń keibir elderi "deltadan" áli tolyq aiyǵa almai jatqan shaqta omikron tarap jatyr. Eýroodaqtyń densaýlyq saqtaý agenttigi aldaǵy birneshe aida naýqastardyń jartysynan kóbin omikron juqtyrǵandar quraidy dep boljaidy.
Qarasha aiynyń ortasynda anyqtalyp, tarai bastaǵan omikron juqtyrǵandar sońǵy málimet boiynsha 16 myńnan asqan. Sarapshylar bul onyń tez taraityndyǵynan habar berse kerek dep topshylaidy. Ońtústik Afrika zertteýshileriniń málimetine qaraǵanda, omikron "delta" jáne koronavirýstyń ózge shtamdaryna qaraǵanda úsh ese jyldam juǵýy múmkin.
