Dúniejúzilik densaýlyq saqtaý uiymynyń Solidarity klinikalyq zertteýi koronavirýsqa qarsy taǵy úsh preparatty synaqtan ótkize bastaidy. Solidarity PLUS preparattardy zertteýdi 52 elde júrgizbek. Bul týraly DDSU saity habarlady.
Dúniejúzilik densaýlyq saqtaý uiymy ózi uiymdastyrǵan Solidarity zertteýleriniń kelesi kezeńi bastalǵanyn málimdedi. Ol Solidarity PLUS dep ataldy. Onyń barysynda COVID-19-ǵa qarsy taǵy 3 preparattyń tiimdiligi statsionarlyq jaǵdaida aýrýhanaǵa túsken naýqastardyń qatysýymen synalady.
Bul preparattar – artesýnat, imatinib jáne infliksimab. Olardy táýelsiz sarapshylar komissiiasy koronavirýspen aýrýhanaǵa túsken naýqastar arasynda ólim sanyn azaitady degen senimmen tańdap alǵan. Olar qazirgi kezde basqa aýrýlardy emdeýde paidalanylady. Mysaly, artesýnat bezgektiń aýyr túrin emdeýde qoldanylsa, imatinib qaterli isiktiń keibir túrlerin emdeidi, al infliksimab Kron aýrýy siiaqty immýndyq júie syrqattarynda jáne revmatoidti artritte qoldanylady.
Solidarity PLUS zertteýlerine 52 eldiń 600 statsionarlyq meditsinalyq mekemesinen myńdaǵan zertteýshi qatysýda.
Budan buryn zertteýler aiasynda tórt preparattyń tiimdiligi baǵalanǵan bolatyn. Zertteýlerdiń qorytyndysy boiynsha, remdesivir, gidroksihlorohin, lopinavir jáne interferon preparattarynyń COVID-19-ben aýrýhanaǵa túsken naýqastardyń ólimine áseri joq nemese áseri bolmashy degen túiin jasalǵan.
