Dúniejúzilik densaýlyq saqtaý uiymy COVID-19 taralýynyń maýsymdyq sipaty joq jáne aýa raiynyń ózgerýimen de bailanysty emes ekenin aitty. Virýstyń taralýyn barlyǵyna belgili qarapaiym ǵana sharalardy qoldanyp qana toqtatýǵa bolady, sonyń biri – áleýmettik qashyqtyqty saqtaý. Bul týraly BUU Jańalyqtar ortalyǵynhabarlaidy.
«Virýstyń taralýyna jyl mezgili áser etetinine senýge ázirge negiz joq. Onyń adamdar kóp jinalatyn, fizikalyq qashyqtyq saqtalmaityn jerde taralatyny belgili», - dedi doktor Margaret Harris.
DDSU-ǵa kelip túsken málimetterge qaraǵanda, búginde COVID-19 virýsyn juqtyrýdyń 16 301 736 oqiǵasy rastalyp, odan 650 069 adam kóz jumdy.
Pandemiianyń oshaǵy – Soltústik jáne Ońtústik Amerika, onda 8,7 mln oqiǵa tirkeldi. Ekinshi orynda Eýropa - 3,2 mln, odan keiin Ońtústik-Shyǵys Aziia (1,8 mln), Shyǵys Jerorta teńizi (1,5 mln), Afrika - 712 920 jáne Batys Tynyq muhity aimaǵy 291 993 tur.
Margaret Harris Jenevada ótken baspasóz konferentsiiasy kezinde COVID-19 virýsynyń maýsymdyq sipatqa ie degen pikirdi joqqa shyǵardy.
«Mysaly, qazirgi kezde jaz mezgili bolyp jatqan AQSh-ta indet órship tur, aýrý juqtyrýdyń eń kóp oqiǵasy sonda tirkelgen», - dedi Harris.
Onyń aitýynsha, qys túsken ońtústik jarty sharda «qyzyq» jaǵdai qalyptasqan: onda maýsymdyq tumaý emes, COVID juqtyrýdyń joǵary kórsetkishi tirkelgen.
«Sondyqtan, Ońtústik jarty sharda tumaý keshirek bastalady dep oilaimyz. Klimaty birqalypty elderde tumaý virýsy «maýsymaralyq» jaǵdaiǵa oralǵan», - dedi Harris.
Eger elderge bir ýaqytta eki virýs - COVID-19 jáne tumaýmen kúres júrgizý kerek bolsa,j aǵdaidyń qalai qalyptasatynyn boljap aitý ázirge qiyn. «Respiratorlyq aýrý deńgeii joǵary jerde ekinshisi tarala bastasa, densaýlyq saqtaý júiesine úlken júkteme túsedi», - dep tolyqtyrdy Margaret Harris.
