Alǵashqy Quryltai sailaýynyń aiaqtalýyna nebári bir saǵat qaldy. Soǵan qaramastan sailaý ýchaskelerindegi adam legi áli de tolastar emes. Biri jumystan keiin kelse, endi biri ýchaske jabylǵanǵa deiin daýys berip úlgerýge asyǵyp jatyr. Saǵat 19:00-ge qarai da sailaýshylar legi áli de jalǵasyp otyr.
Kúni boiy túrli býyn ókilderi belsendilik tanytty. Jastar men orta jastaǵy azamattarmen qatar aǵa býyn ókilderi de óz tańdaýyn jasady. Olardyń arasynda 116 jastaǵy sailaýshy men 105 jastaǵy soǵys ardageri bar. Daýys berýge múgedektigi bar azamattar, onyń ishinde arbamen qozǵalatyn sailaýshylar da keldi.
Sailaý ýchaskelerinen erekshe oqiǵalar da áli de tirkelip jatyr. Alataý qalasynda jas otbasy aldymen daýys berip, keiin ekinshi sábiin kútip júrgen erli-zaiyptylar dál sol sailaý ýchaskesinde gender-pati ótkizdi. Al Shyǵys Qazaqstanda ShQTÝ rektory daýys berýge júrgizýshisiz elektromobilmen keldi.
Sailaý Qazaqstannan tys jerlerde de jalǵasyp jatyr. Syrtqy ister ministrliginiń málimetinshe, shetelde 78 sailaý ýchaskesi ashylǵan. Osy ýaqytqa deiin olarda 4378 adam daýys bergen.
Al birqatar sheteldik sailaý ýchaskeleri jumysyn aiaqtap ta úlgerdi. Olardyń qatarynda Ońtústik Koreia, Japoniia, Qytai, Singapýr, Malaiziia, Mońǵoliia, Indoneziia, Tailand jáne Vetnamdaǵy sailaý ýchaskeleri bar.
