Almaty oblysyndaǵy daýyl kezinde qaza tapqan Ulttyq ulannyń áskeri qyzmetshisi Almas Shahimov marapatqa usynylady. Bul týraly 5571 áskeri bóliminde buqaralyq aqparat quraldarynyń ókilderimen ótken baspasóz máslihatynda belgili boldy, – dep habarlaidy Polisia.kz.
Jaýyngerlik daiarlyq josparyna sáikes 8-13 tamyz aralyǵynda 5571 áskeri bóliminiń jedel maqsattaǵy batalonynyń jeke quramy (Almaty qalasy) 5574 áskeri bóliminiń oqý ortalyǵynda (Almaty oblysy, Jetigen kenti) dalalyq oqý-jattyǵýda bolǵan.
9 tamyz shamamen saǵat 20:55-te qatty daýyl soǵyp, tigilgen shatyrlar qirai bastaidy. Qatardaǵy jaýynger Almas Shahimov áriptesterimen birge birinshi kezekte jeke quramnyń qaýipsiz jerge shyǵýyna jáne shatyrly qalashyqtyń qiraýyn joiýǵa kómek kórsete bastaǵan. Qaýipti orynnan sońǵy shyqqan Almas shatyrdyń metall jaqtaýynyń jelmen julynǵan soqqysynan basynan jaraqat alady. Oǵan dereý alǵashqy meditsinalyq kómek kórsetiledi. Sarbaz Qonaev qalasynyń meditsinalyq mekemesine jetkizilgennen keiin onyń qaitys bolǵany anyqtaldy.
Jaýynger óziniń janqiiarlyq áreketimen qarýlastaryn qutqarý barysynda aýyr jaraqat alyp, mert boldy.
Almas Shahimov 2003 jyly dúniege kelgen. Aqmola oblysy Kókshetaý qalasynyń Qorǵanys isteri jónindegi departamentimen 2022 jyldyń kókteminde shaqyrylǵan.
– Biz joldasymyzdy, Otanymyzdyń qorǵaýshysyn joǵaltyp aldyq. Tabiǵi apattardy boljaý múmkin emes. Daýyl týraly eskertý bolǵan joq. Ol óz ómirine qaýip tónse de, áriptesterine kómektesti, sońǵy bolyp shatyrdan shyqty. Qatty jeldiń saldarynan metall konstrýktsiialar qulady. Ol basynan jaraqat aldy. Keiin aýrýhanaǵa jiberdi. Biraq, ókinishke qarai, saǵat 21:30-da qalalyq aýrýhananyń dárigerleri jaýyngerdiń qaza bolǵanyn habarlady.
Qyzmettiń alǵashqy kúnderinen bastap ol ózin adal sarbaz, naǵyz azamat, Otan qorǵaýshysy retinde kórsetti. 27 mamyrda Kókshetaýdan shaqyryldy. Bir ai boiy óziniń qyzmettesterimen birge qyzmettik pýnktte boldy. Áskeri boryshyn oryndaý kezinde qaza tapty. Ol - Ulttyq ulannyń, halqymyzdyń qaharmany, ata-anasynyń naǵyz uly, – dedi “Ońtústik” óńirlik qolbasshylyǵy qolbasshysynyń birinshi orynbasary Bekaidar Qazkeev.
Qatardaǵy jaýynger Almas Shahimovtyń denesi Almatydan Kókshetaýǵa áskeri bortta jiberiletin bolady. Almastyń ata-anasyna zańnamaǵa sáikes 500 AEK (1 531 500 teńge) jáne 80 AEK (245 040 teńge) materialdyq kómek kórsetiledi. “Ońtústik” ÓńQ qolbasshylyǵy áskeri qyzmetshini qaitys bolǵannan keiin kótermeleý týraly ótinish jasaityn bolady.
Daýyl kezinde taǵy 14 áskeri qyzmetshi jaraqat aldy, olardyń úsheýi - kelisimshart boiynsha qyzmet etetin áskeri qyzmetshiler. Olarǵa meditsinalyq kómek kórsetildi.
– Qyzmettik tergeý óńirlik qolbasshylyq aýqymynda júrgiziledi. Áskeri tergeý basqarmasy, áskeri prokýratýra da óz baǵasyn beredi. Barlyǵy ashyq tekseriledi, – dedi ofitser.
Atalǵan kúni sarbazdar jedel maqsattaǵy dalalyq shyǵýǵa qatysty. Bólimshe jumysynyń rettiligi pysyqtaldy, túngi jáne kúndizgi oq atýlar, is-qimyl taktikasy – túrli mindetterdi oryndaý-qoǵamdyq tártipti qorǵaý, tehnogendik sipattaǵy daǵdarys jaǵdailarynda jumys isteý boldy. Oqý-jattyǵýǵa barlyǵy 250 sarbaz qatysty.
Shatyrdy áskeri qyzmetshilerdiń ózderi komandirlerdiń basshylyǵymen ornatty. Ol - reseilik ónim. Bólimge jiberer aldynda barlyq shatyrlardy komissiia tekseredi.
– Onyń komandirleri men bastyqtary jaqyn jerde bolyp, kómek kórsetti. Metall qurylymy 100-150 metr radiýsta ushyp ketti. Maǵan baǵynyshty adamdar keibir kólikterdiń qatty daýyldan ainalǵanyn aitty. Almas kópsalaly qutqarý ýchilishesin bitirgen. Joldastaryna kómektesýge daiyn boldy. Biz úshin ol máńgi batyr bolyp qala beredi, – dedi 5571 áskeri bóliminiń komandiri Baqdáýlet Ospanbekov.
Baspasóz máslihatynda marqumnyń áriptesteri osy oqiǵa týraly aitty. Olardyń sózinshe, qaitys bolǵan jaýynger sarbazdarǵa kómekke kelgen, biraq kórinýdiń nasharlyǵyna bailanysty ózin qutqara almaǵan.
– Biz úsheýimiz BÓP-te kezekshilikte boldyq. Saǵat 21:00-ge jaqyn daýyl bastaldy. Biz borannan tyǵylý úshin birinshi rotanyń shatyryna bet aldyq. Ony jel qozǵap, biz ony ustap turýǵa tyrystyq, ne isteý kerektigin bilmedik. Almas bizge kómekke keldi, bizdi qaýipsiz jerge apardy. Biz ony 10 minýt kúttik, sodan keiin men ony izdeýge shyqtym. Baryp qaraǵanymda ol jerde jatyr eken. Biz dárigerlerdi shaqyrdyq. Onyń betinde qan boldy, – dedi qatardaǵy jaýynger Aqylbek Amanov.
– Ol úsheýimizdi shyǵardy, sodan keiin júgirip ketti. Shańda eshteńe kórinbedi. Ol bizdi shyǵaryp alyp, dýalǵa apardy, biz otyrdyq, ol basqalardy qutqarýǵa ketti. Onyń qai baǵytqa bet alǵanyn kóre almadyq. Qaýipsizdik sharalary týraly bizge nusqaý berildi. Biraq keshe bul daýyl kútpegen jerden bastaldy. Búkil batalon bir shaqyrym jerde atys alańynda boldy. Barlyq komandir sonda edi. Biz úsheýmiz ekinshi rotadanbyz. Ol birinshi rotadan, – dedi qatardaǵy jaýynger Dmitrii Badýlov.
Sarbazdar shatyrdan shyqqannan keiin olardyń keibireýleri jaqyn mańdaǵy KamAZdy yqtaǵan – shatyrdy qatty jel alyp ketti.
Nurlan Qaldybekovtyń aitýynsha, ol Almaspen úsh ai boiy tanys bolǵan.
– Keshe atys alańynda jarysqan siiaqty edik. Búgin endi ol joq. Men Shymkenttenmin. Qarakemerde oqýda bir jarym ai boldyq. Barlyǵy ony qurmetteitin. Ol batyl, naǵyz batyr edi. Biz ol da KamAZǵa evakýatsiialandy dep oiladyq, – dedi ol.
Áriptesteriniń aitýynsha, sarbaz eshkimmen nashar qarym-qatynasta bolmaǵan. Olar Almastyń aýrýhanaǵa jetkizilgenin ratsiia arqyly bilgen.
Qazaqstan Respýblikasy Ulttyq ulanynyń Bas qolbasshylyǵy men “Ońtústik” óńirlik qolbasshylyǵy qatardaǵy jaýynger Almas Shahimovtyń ata-anasy men jaqyndaryna qaiǵyryp kóńil aitady.
